ىستانبۇلداعى قانداستار تاۋەلسىزدىك كۇنىنە وراي باس قوستى

نۇر- سۇلتان. قازاقپارات - تۇركيا قازاقتارى قۇرعان ۇيىمداردىڭ ءبىرى - قازاقكەنت التاي قاۋىمداستىعىنىڭ ۇيىتقى بولۋىمەن قازاق دياسپوراسى ىستانبۇلدا تاۋەلسىزدىكتىڭ 30 جىلدىعىنا ارنالعان مەرەكەلىك ءىس- شارا وتكىزدى.

قانداستارىمىزدىڭ كۇشىمەن جانە قازاقستاننىڭ ىستانبۇلداعى باس كونسۋلدىعىنىڭ قولداۋىمەن وتكىزىلگەن ءىس- شارا مەرەكەلىك كونتسەرتپەن باستالىپ، قوناقتارعا ۇلتتىق تاعامداردىڭ ۇسىنىلۋىمەن جالعاستى. سونداي- اق، شارا اياسىندا ىستانبۇلداعى جاس قانداستار فۋتبولدان جارىس وتكىزدى. ىستانبۇل قازاقتارىنىڭ باسقوسۋىندا باس كونسۋل ءالىم بايەل دياسپورانىڭ بەلسەندى وكىلدەرىنە العىس حاتتار مەن ەستەلىك سىيلىقتار تابىستادى.

جىراقتا جۇرسە دە، اتاجۇرتتىڭ ازاتتىعى مەن وركەندەۋىنە قاشان دا تىلەكتەس بولىپ جۇرگەن الىستاعى اعايىن قازاق ەلىنىڭ وزدەرىنە كورسەتكەن قامقورلىعى ءۇشىن العىس ءبىلدىردى. سونىمەن قاتار، ايتۋلى مەرەكەنى قانداستارمەن تويلاۋ اياسىندا باس كونسۋل ءا. بايەل قازاق دياسپوراسى قۇرعان تاعى ءبىر ۇيىم - قوجا احمەت ياساۋي عىلىم جانە پاراسات قورىندا دياسپورا وكىلدەرىمەن كەزدەسىپ، تاۋەلسىزدىك جانە قازاق- تۇرىك ىنتىماقتاستىعى جونىندە اڭگىمە قۇردى.

جالپى، تاۋەلسىزدىكتىڭ 30 جىلدىعىنا وراي، الىپ شاھاردا جىل باسىنان بەرى ءبىرتالاي شارا ءوتتى. اتاپ ايتقاندا، اباي الاڭى مەن ەسكەرتكىشى اشىلىپ، دۇنيەجۇزى قازاقتارى قاۋىمداستىعىنىڭ كىشى قۇرىلتايى ءوتتى. سونىمەن قاتار، قازاقستان تاۋەلسىزدىگىنىڭ 30 جىلدىعىنا ارنالعان كۇمىس ەستەلىك مونەتا باسىلدى.

بۇدان بولەك، مۇستافا وزتۇرىك اتىنداعى ساياباق اشىلدى. قازاقتىڭ ونەرى مەن مادەنيەتىن، ەلىمىزدىڭ الەۋەتىن تانىستىرۋ ماقساتىندا تاتتىمبەت اتىنداعى وركەستردىڭ كونسەرتى، «ۇلىتاۋ» توبىنىڭ كونسەرتى، «الاتاۋ» تەاترىنىڭ «التىباقان» ويىن- ساۋىق كەشى، «توميريس» جانە «قازاق حاندىعى» فيلمدەرىنىڭ كورسەتىلىمى، «وردالى ەلدىڭ 30 جىلى» جەتىستىكتەر كورمەسى، «تاۋەلسىزدىكتىڭ 30 جىلى جانە ينۆەستيتسيالىق مۇمكىندىكتەر» دوڭگەلەك ۇستەلى ۇيىمداستىرىلدى. سونداي- اق، قازاقستاندىق ستۋدەنتتەردىڭ سلتى ءوتىپ، ىستانبۇلدا ءبىلىم الىپ جاتقان جاستاردىڭ «بىرلىك» ۇيىمى قۇرىلدى.

اۆتور: مارلان جيەمباي