قازاقپارات ءتىلشىسى كيەلى جەرلەر تۋرالى دەرەكتى فيلم تۇسىرۋگە ۇيىتقى بولدى
دەرەكتى فيلمدى ءتۇسىرۋ يدەياسىنىڭ اۆتورى - «قازاقپارات» حالىقارالىق اقپارات اگەنتتىگىنىڭ ءتىلشىسى ۆيكتور سۋتياگين.
«جىل سايىن ەڭبەك دەمالىسىمدى، سونداي- اق بىرنەشە كۇنگە سوزىلاتىن مەرەكەگە بايلانىستى دەمالىس كۇندەرىن تەككە وتكىزبەي، وزگە ەلدەرگە ساياحاتتاعاندى جانىم قالايدى. ال بىلتىر پاندەمياعا بايلانىستى شەكتەۋلەر ەنگىزىلىپ، ساياحاتقا شىعا المادىم. ءبىراق، دەمالىسىمدى بوسقا وتكىزگىم كەلمەدى. بۇرىننان ارىپتەستىك بايلانىس ورناتقان وپەراتورلار تەمىرلان سۇلتانعازيەۆ پەن ءازىلحان ۋاحيتوۆقا اتىراۋ وبلىسىنداعى تاريحي، مادەني ورىنداردى ارالاپ، روليك ءتۇسىرۋ جونىندە ۇسىنىس ايتتىم»، - دەيدى ۆيكتور سۋتياگين.
ونىڭ ايتۋىنشا، العاشقى روليك ءتۇسىرۋدى يندەر اۋدانىنداعى تۇزدى كولدەن باستاعان. مۇندا جاز ايلارىندا ەلىمىزدىڭ ءار وڭىرىنەن، ءتىپتى وزگە دە مەملەكەتتەردەن كەلۋشىلەر كوپ. تۇزدى كولدەن، جىلىوي اۋدانىنداعى اقتولاعاي اتالاتىن بورلى تاۋ شاتقالىنان تۇسىرىلگەن روليكتەر الەۋمەتتىك جەلىدە جاريالانعان.
«جىلىوي اۋدانىندا اقتولاعاي دەپ اتالاتىن بورلى تاۋ شاتقالى بار. سول جەردەن العان اسەردى سوزبەن ايتىپ جەتكىزۋ قيىن. اقتولاعايدى كوزبەن كورۋ كەرەك. يساتاي اۋدانىنداعى قۇمدى توبە دە - تابيعات سىيى. وسىنىڭ ءبارىن روليككە ءتۇسىرىپ، الەۋمەتتىك جەلىگە جاريالادىق. روليكتىڭ ءوزىن عانا ۇسىنباي، ءار تاريحي، مادەني ورىندارعا قاتىستى دەرەكتەردى دە قوسا جاريالادىق. ويتكەنى، بۇرىن مۇنداي تاريحي ورىندار تۋرالى دەرەكتەردى تەك تاريحشىلار مەن ارحەولوگتار عانا بىلەتىن. ەندى وسىنداي دەرەكتەر ستۋدەنتتەر مەن وقۋشىلار، بارشا تۇرعىندار ءۇشىن قولجەتىمدى بولعانىن قالادىم. ءبىزدىڭ بۇل يدەيامىزدىڭ دۇرىستىعىن روليكتەرىمىزگە پىكىر بىلدىرۋشىلەردىڭ كوبەيۋىنەن اڭعاردىق. وڭىردەگى شەتەلدىك كومپانيا وكىلدەرى وسىنداي روليكتەردى جيناقتاپ، دەرەكتى فيلم ءتۇسىرۋدى جالعاستىرۋعا قولداۋ ءبىلدىردى»، - دەيدى ۆيكتور سۋتياگين.
«قازاقپارات» ح ا ا ءتىلشىسى ۇيىتقى بولعان دەرەكتى فيلمدە 4 سەريا بار. دەرەكتى فيلم قازاقشا، ورىسشا جانە اعىلشىن تىلىندە دايىندالعان. ەندى ونى جەرگىلىكتى تەلەارنالار مەن اقپاراتتىق رەسۋرستاردان كورسەتۋ جوسپارلانىپ وتىر.
«ءبىزدىڭ ماقساتىمىز - اتىراۋ وبلىسىنداعى ىشكى ءتۋريزمدى دامىتۋعا ىقپال ەتەتىن تاريحي، مادەني ورىنداردى جۇرتشىلىق نازارىنا ۇسىنۋ. وسى ماقساتپەن يندەر، ماحامبەت، ماقات، جىلىوي اۋداندارىنداعى كيەلى جەرلەر گەوگرافياسىنا ەنگەن تاريحي، مادەني ورىندار تۋرالى روليكتەر تۇسىردىك. دەرەكتى ءفيلمدى ودان ءارى جالعاستىرۋ ءۇشىن قىزىلقوعا مەن قۇرمانعازى اۋداندارىنا بارىپ، وسىنداي روليكتەر ءتۇسىرۋدى كوزدەپ وتىرمىز»، - دەپ الداعى جوسپارىمەن ءبولىستى اگەنتتىك ءتىلشىسى.