ساۋىتبەك ابدراحمانوۆ: ەلباسىنا بەرىلەتىن باعانىڭ بىرەۋى - ءوزىنىڭ ساياسي ءىزباسارىن تاربيەلەۋى
«ەلباسىمىز نۇرسۇلتان نازاربايەۆ دەر شاعىندا، ۇلىستىڭ ۇلى تويىنىڭ ءدال قارساڭىندا جاريالاعان «تاۋەلسىزدىك تاعىلىمى» اتتى ەڭبەگىندە: «ءبىز اتوم قارۋىنان ءوز ەركىمىزبەن باس تارتىپ، بۇكىلالەمدىك يادرولىق قارۋسىزدانۋ كوشىن باستادىق. بۇل - قازاقستاننىڭ جاھاندىق بەيبىتشىلىكتى ساقتاۋعا قوسقان تەڭدەسسىز ۇلەسى» دەپ اتاپ ايتقان، قاداپ كورسەتكەن. ءيا، قازاقستاننىڭ الەمدەگى بەيبىتشىلىك جولىنداعى شەرۋدىڭ كوشىن باستاعانىنىڭ وزىنە وتىز جىل تولىپ وتىر. ونى وتىز جىلدان بەرى بۇكىل الەم ءبىلىپ، لايىقتى باعالاپ وتىر»، - دەپ اتاپ ءوتتى قوعام قايراتكەرى.
ساۋىتبەك ابدراحمانوۆتىڭ پىكىرىنشە، بۇل سوزگە دالەلدى الىستان ىزدەۋدىڭ قاجەتى جوق.
«وسىدان ەكى كۇن بۇرىن ا ق ش پرەزيدەنتى دجوزەف بايدەننىڭ قازاقستان پرەزيدەنتى قاسىم- جومارت توقايەۆتىڭ اتىنا مەملەكەتىمىز تاۋەلسىزدىگىنىڭ مەرەيتويىنا وراي جولداعان قۇتتىقتاۋى جاريالاندى. وندا:
«قازاقستاننىڭ ورتالىق ازيادا جانە بۇكىل الەمدە بەيبىتشىلىك، تۇراقتىلىق پەن گۇلدەنۋدى ساقتاۋ جولىندا كوش باستاپ كەلە جاتقانىنىڭ 30 جىلدىق مەرەيتويى قارساڭىنداعى قۋانىشىڭىزعا ورتاقپىن» دەپ جازىلعان. كىم ايتسا دا وڭاي ءسوز ەمەس. الەمدەگى ەڭ قۋاتتى ەلدىڭ ليدەرى ايتسا، ءتىپتى سالماقتى ءسوز. ال سودان، ياعني نۇرسۇلتان نازاربايەۆ قازاق جەرىندەگى اجال ارانىنا ءوز قولىمەن قۇم قۇيىپ، تاجالدى تۇنشىقتىرعاننان نەبارى بەس- اق جىل بۇرىن ءبىز قانداي ەل ەدىك؟ ماسكەۋ ويىنداعىسىن جاسايتىن، كادرلىق ەكسپەريمەنت وتكىزىپ، توپىراعىمىزعا تابانى ءتيىپ كورمەگەن كولدەنەڭ كوك اتتىنى ءبىزدى باسقارۋعا جىبەرە سالاتىن ەل ەمەس پە ەدىك؟ سول ەلدىڭ ەتەكتەگى باسىن تورگە شىعارىپ بەرگەن ەرەن ەردىڭ كەشە جاريا ەتىلگەن تولىمدى تولعاۋى تاۋەلسىزدىكتىڭ تار جول، تايعاق كەشۋىن اڭگىمەلەۋمەن عانا شەكتەلمەيدى، ەگەمەندىككە ۇمتىلۋمەن وتكەن حالىقتىڭ ەڭ قاسيەتتى قۇندىلىقتى قاندايلىق قاستەرلەۋگە ءتيىستى ەكەندىگىن دە تەبىرەنە ءسوز ەتەدى»، - دەيدى حالىق قالاۋلىسى.
ونىڭ ايتۋىنا قاراعاندا، ءوز جەرىندە نەبارى قىرىق پايىزدى قۇراپ تۇرعان قازاقتىڭ سول سىن ساعاتتا سىر بەرمەۋى، تەك رۋحى كۇشتى، بىرلىگى بەكەم جۇرت قانا الا الاتىن اسۋلاردان اسۋى قاسيەتتى كيەمىز - تاۋەلسىزدىككە سابىر مەن توزىمدىلىك، اقىل مەن پاراسات ارقىلى قول جەتكىزۋىنىڭ ارقاسى ەكەندىگىن تاريحتىڭ تار كەزەڭىن تاماشا تالداي وتىرىپ، تۇسىندىرەدى.
«ءبىز تاۋەلسىزدىككە بەيبىت جولمەن قول جەتكىزسەك تە، وعان بارار جولدا بابالار قانى از توگىلگەن جوق. تاۋەلسىزدىك سول كيەلى قاننىڭ وتەۋى ەدى. مەن مۇنىڭ ءبارىن ءبىز سەنگەن، تاربيەلەگەن بۇگىنگى جاس ۇرپاق ءبىلسىن، ساناسىنا ءسىڭىرسىن دەپ ادەيى جازىپ وتىرمىن»، دەيدى نۇرسۇلتان نازاربايەۆ.
بۇگىنگىنىڭ ءبارى وپ- وڭاي بولا قالعانداي، قازىرگى بەرەكە وزدىگىنەن كەلە قالعانداي، شەكارامىز شيەلەنىسسىز بەكىتىلە قالعانداي، ەلوردامىز اياق استىنان ورناي قالعانداي، سان ءتۇرلى ۇلتتىڭ باسى ءاپ- ساتتە ءبىر ماقساتقا بىرىگە قالعانداي كورەتىندەر كوبەيمەسە، ازايماي تۇرعان وسىنداي شاقتا وسىلاي ايتاتىن كەز دە كەلگەن ەدى. ءار ادامعا بەرىلەتىن باعانىڭ بىرەۋى ءوزىنىڭ ۇل- قىزىنىڭ تاربيەسى دەسەك، ۇستازعا بەرىلەتىن باعانىڭ بىرەۋى شاكىرتىنىڭ دەڭگەيى دەسەك، ەل ۇستازى بولىپ تابىلاتىن ەلباسىنا بەرىلەتىن باعانىڭ بىرەۋى - ءوزىنىڭ ساياسي ءىزباسارىن تاربيەلەۋى. بۇل تۇرعىدان ءبىز ەلباسىمىزعا قاسىم- جومارت توقايەۆ سىندى ازاماتتى جاس كۇنىنەن تامىرشىداي تانىپ، وسىنشا جىلدار بويى باۋلىپ، قاناتتاندىرىپ، سان قياعا سالىپ، بيىكتەرگە ۇشىرىپ، سىناقتارعا ءتۇسىرىپ، ءتۇرلى لاۋازىمدى قىزمەتتەر بەرىپ بايقاپ، وسىنداي دەڭگەيگە كەلتىرگەنى ءۇشىن رازىلىعىمىزدى بىلدىرەمىز.
«وتىز جىلعا جۋىق ەل باسقارعان كەزىمدە مەن جانىما قانشاما ازاماتتى سەرىك ەتىپ، كوپتەگەن شاكىرت تاربيەلەدىم. سولاردىڭ ىشىندە ۇكىمەت باسقارعان، بىرىككەن ۇلتتار ۇيىمى باس حاتشىسىنىڭ ورىنباسارى رەتىندە جاھاندىق ساياساتقا جەتىكتىگىن تانىتقان، تاۋەلسىزدىكتىڭ العاشقى جىلدارىنان باستاپ قاسىمنان تابىلعان ناعىز پاتريوت، جوعارى بىلىكتى كاسىپقوي تۇلعا قاسىم- جومارت كەمەل ۇلى توقايەۆتى پرەزيدەنتتىك قىزمەتكە ۇسىندىم. سايلاۋدا حالىقتىڭ باسىم كوپشىلىگى ونى قولدادى. وسىلايشا، ءبىز حالقىمىزدىڭ اۋىزبىرلىگىن، ساياساتتاعى ساباقتاستىعىمىزدى كۇللى الەم قوعامداستىعىنا تاعى ءبىر قىرىنان تانىتا بىلدىك»، دەيدى ەلباسى.
تاۋەلسىزدىك تويى قارساڭىندا ايتىلعان بۇل سوزدەر ءبىزدىڭ بارشامىزدىڭ كەلەر كۇندەرگە، كەمەل كەلەشەككە سەنىمىمىزدى ارتتىرا تۇسەدى ، - دەپ تۇيىندەيدى ءسوزىن ءماجىلىس دەپۋتاتى ساۋىتبەك ابدراحمانوۆ .