وسكەمەندىك زەينەتكەر بىرنەشە كۇن قيراندى استىندا جاتىپ، امان قالدى
ەر ادام بىرنەشە كۇن قيراندى استىندا جاتىپ، ادام سەنگىسىز جاعدايدا امان قالدى، - دەپ حابارلايدى استانا تەلەارناسى.
ءبىرىنشى كورشىلەرى حابارلاعان، سەبەبى ولار بىرنەشە كۇن بويى جالعىز تۇراتىن الەكساندر گەنناديەۆيچتى كورمەگەن. وعان جەتۋ مۇمكىن بولماعاسىن، قۇتقارۋشىلاردى شاقىرۋعا تۋرا كەلگەن.
وقيعا ورنىنا جەتكەن جەدەل جاردەم قىزمەتكەرلەرى ءۇيدىڭ وپىرىلىپ جاتقانىن كورگەن، ۇيىلگەن تاقتايلار مەن قوقىستاردىڭ استىنان زەينەتكەردى تاپقان.
«ول بىرنەشە كۇن قوقىس استىندا جاتقان. ارنايى جاساقتىڭ قىزمەتكەرلەرى مۇقيات كوتەرىپ، ۇيدەن الىپ شىقتى»، - دەدى ش ق و ت ج د باسپا ءسوز حاتشىسى مارينا ليسكوۆا.
دارىگەرلەر الەكساندر گەنناديەۆيچ دۇنيەگە جاڭا كەلگەندەي بولدى دەيدى. قىستا جىلىتىلماعان ۇيدە، قوقىستاردىڭ استىندا بىرنەشە كۇن جاتىپ، وسىلاي ءتىرى قالۋىن كەرەمەت جاعداي دەپ اتاۋعا بولادى.
«ناۋقاستىڭ جاعدايى ورتاشا اۋىر. ول كومىرتەگى توتىعىمەن ۋلانعان. وتقا قاتىستى ابايسىز ارەكەت سالدارىنان نەمەسە قانداي دا ءبىر مامانداندىرىلماعان جىلىتۋ قۇرالدارىنان بولۋى مۇمكىن»، - دەدى №1-قالالىق اۋرۋحانانىڭ توكسيكولوگيا ءبولىمىنىڭ مەڭگەرۋشىسى الەكساندر مەيستەر.
دارىگەرلەردىڭ ايتۋىنشا، جاعدايى اسقىنباسا، ناۋقاس اۋرۋحانادا ءبىر اپتا بولادى. دارىگەرلەر زەينەتكەردىڭ تۋىستارىن تابۋ ءۇشىن الەۋمەتتىك قىزمەتكە جۇگىندى، ويتكەنى ەمدەلۋدەن كەيىن وعان كۇتىم قاجەت.
«ونىڭ تۋىستارىنىڭ ءبىرى بىزبەن حابارلاسادى دەپ سەنەمىز، ءبىراق ناۋقاستىڭ ءوزى تۋىستارى جوق ەكەنىن ايتتى»، - دەيدى الەكساندر مەيستەر.
زەينەتكەرگە اپاتتىق جاعدايدا تۇرعان ۇيگە ورالۋعا بولمايدى، ول ادام تۇرۋعا جارامسىز. كورشىلەرى جالعىز باستى قارتتىڭ باسىنداعى بۇل ءبىرىنشى وقيعا ەمەس ەكەنىن ايتتى.
«ول مۇندا ءومىر سۇرە المايدى، ەدەنى دە، جارىعى دا، سۋى دا جوق، ۇيدە ەشتەڭە جوق. ءۇشىنشى رەت ءورت بولىپ تۇر»، - دەيدى كورشىسى ناتاليا سۋلەيمانوۆا.
تەلەارنا جۋرناليسى الەكساندر گەنناديەۆيچتىڭ قالادا قىزى بار ەكەنىن ايتادى، ءبىراق ولار بىرنەشە جىلدان بەرى سويلەسپەيدى. الەۋمەتتىك سالا ماماندارى زەينەتكەر ەمدەلگەننەن كەيىن وبلىستاعى مەديتسينالىق- الەۋمەتتىك مەكەمەلەردىڭ بىرىنە جاتقىزىلاتىنىن ايتتى.
