اتىراۋ وبلىسى اكىمىنىڭ ورىنباسارى باقىتگۇل حامەنوۆا رەۆاكسينا الدى

اتىراۋ. قازاقپارات - بۇگىن اتىراۋ وبلىسىندا رەۆاكسينالاۋ باستالدى، دەپ حابارلايدى قازاقپارات. وبلىستىق دەنساۋلىق ساقتاۋ باسقارماسى باسپا ءسوز قىزمەتىنىڭ اقپاراتىنا قاراعاندا، رەۆاكسينالاۋدى قاتارىندا دارىگەرلەر مەن پوليتسيا قىزمەتكەرلەرى، مۇعالىمدەر، قۇقىق قورعاۋ ورگاندارى مەن ارنايى مەكەمەلەردىڭ قىزمەتكەرلەرى، مەملەكەتتىك قىزمەتشىلەر، سونداي-اق سوزىلمالى سىرقاتى بار پاتسيەنتتەر الادى.

بۇگىن، 23-قاراشادا رەۆاكسينالاردى الۋعا العاشقىلاردىڭ قاتارىندا اتىراۋ وبلىسى اكىمىنىڭ ورىنباسارى باقىتگۇل حامەنوۆا، ءوڭىردىڭ باس مەملەكەتتىك سانيتاريالىق دارىگەرى مادەنيەت تاناۋوۆ پەن وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ كەلدى.

«مەن 1-اقپاندا Sputnik V ۆەكتورلى ۆاكسينانىڭ I كومپونەنتىن، ال، 21 كۇننەن كەيىن ەكىنشىسىن العان ەدىم. بۇگىن QazVac يناكتيۆاتسيالانعان وتاندىق ۆاكسينانى سالدىردىم. قازىر ءوزىمدى جاقسى سەزىنەمىن» - دەدى باقىتگۇل حامەنوۆا.

وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا، رەۆاكسينا الۋشىلارعا ۆەكتورلى جانە بەلسەندى ەمەس ەكپەنىڭ ەكى ءتۇرى ۇسىنىلىپ وتىر.

«Sputnik V - ۆەكتورلى، ال، وزگە ۆاكسينالار بەلسەندىرىلمەگەن. ۆەكتورلى ۆاكسينا العان ادامدارعا 9 ايدان كەيىن يناكتيۆاتسيالانعان ۆاكسينانى سالدىرۋعا بولادى. وسى ورايدا ولارعا Vero Cell نەمەسە QazVac ۆاكسينالارىن الۋ ۇسىنىلادى. ال، كەز كەلگەن يناكتيۆاتسيالانعان ۆاكسينا العاندارعا Sputnik V ۆەكتورلىق ۆاكسينانى 6 ايدان كەيىن ەكتىرەدى» - دەيدى اسحان بايدۋاليەۆ.

اۆتور: بەك مۇستافا