قىتاي ليتۆامەن ديپلوماتيالىق قاتىناس دەڭگەيىن تومەندەتتى

مۇنداي مالىمدەمەنى وسى ەلدىڭ سىرتقى ىستەر مينيسترلىگى جاريالادى. وعان تايۆاننىڭ قاراشانىڭ 18- كۇنى ليتۆادا ءوز وكىلدىگىن اشۋى سەبەپ.

بەيجىڭنىڭ مالىمدەۋىنشە، بۇل قىتايدىڭ ەگەمەندىگى مەن اۋماقتىق تۇتاستىعىن بۇزىپ، ەلدىڭ ىشكى ىستەرىنە ورەسكەل ارالاسۋشىلىق. سونداي- اق ليتۆا تايۆانعا وكىلدىك اشۋعا رۇقسات بەرۋ ارقىلى قىتايدىڭ ۇستامى مەن ەكىجاقتى بايلانىسقا نەمقۇرايلىق تانىتىپ، الەمدە تەرىس جاعداي تۋعىزاتىن ارەكەتكە باردى دەيدى. وسىعان بايلانىستى بەيجىڭ ەكىجاقتى ديپلوماتيالىق قاتىناستى تومەندەتۋگە ءماجبۇر بولعانىن ايتادى.

ليتۆا جاز كەزىندە تايۆاننىڭ وكىلدىگىن اشۋدى جوسپارلاپ وتىرعانىن مالىمدەگەن. وكىلدىكتىڭ ديپلوماتيالىق مارتەبەسى جوق، ءبىراق كونسۋلدىق قىزمەت كورسەتە الادى. وسى سەبەپتى قىتاي تامىز ايىندا ليتۆاداعى ەلشىسىن كەرى قايتارىپ العان. سەبەبى بەيجىڭ سىرتقى ساياساتتا «ءبىر قىتاي» ساياساتىن ۇستانىپ، تايۆاندى ءوزىنىڭ پروۆينسياسى دەپ سانايدى.

www.24.kz