قىتايدا كوروناۆيرۋس جۇقتىرۋ قارقىنى تومەندەپ كەلەدى

بۇل تۋرالى دەمالىس كۇندەرى بريفينگ كەزىندە ق ح ر دەنساۋلىق ساقتاۋ جونىندەگى مەملەكەتتىك كوميتەتتىڭ رەسمي وكىلى مي فەن ءمالىم ەتتى، دەپ حابارلايدى قازاقپاراتتىڭ مەنشىكتى ءتىلشىسى.

«14 كۇننەن اسا كوروناۆيرۋستىڭ قازىرگى تولقىنى ورشىگەن 8 پروۆينتسيادا جاڭا جەرگىلىكتى جۇقتىرۋ جاعدايلارى تىركەلگەن جوق. حەيحە جانە داليان قالالارىنداعى ۆيرۋستىڭ ءورشۋى توقتادى. ۇلتتىق دەڭگەيگە شىققان قازىرگى تولقىن اياقتالۋعا جاقىن»، - دەپ مالىمدەدى مي فەن.

ونىڭ ايتۋىنشا، قىتاي COVID-19-دىڭ الدىن الۋ جانە باقىلاۋ ساياساتىن جۇرگىزۋدى جالعاستىرادى، سونىمەن قاتار ەلدىڭ پورتتارىندا الدىن الۋ شارالارى كۇشەيەدى.

19- قاراشاداعى جاعداي بويىنشا 2020-جىلدىڭ جەلتوقسانىنان باستاپ قىتاي دارىگەرلەرى 2,42 ميلليارد ەكپە سالعان. ۆاكسينالاۋدىڭ تولىق كۋرسىن العان ادامدار سانى - 1 ميلليارد 76 ميلليون.

ەسكە سالا كەتەيىك، قىتايداعى كوروناۆيرۋستىڭ قازىرگى «جەرگىلىكتى» تولقىنى 17- قازان كۇنى باستالدى، وسى ۋاقىتقا دەيىن پروۆينتسيا مەن اۋداندارداردا 1,6 مىڭنان استام ادام ۆيرۋس جۇقتىرعان.

سوڭعى كۇندەرى قىتايدىڭ قۇرلىقتاعى بولىگىندە 17 جاڭا جۇقتىرۋ جاعدايى (ولاردىڭ تورتەۋى - جەرگىلىكتى) تىركەلدى.

ءتورت جەرگىلىكتى جاعداي لياونين (داليان قالاسى) جانە يۋننان پروۆينتسيالارىندا انىقتالدى.

سوڭعى دەرەكتەرگە سايكەس، قىتايدىڭ قۇرلىقتاعى بولىگىندە ۆيرۋس جۇقتىرعانداردىڭ %94,17 جازىلىپ شىققان. 2019-جىلدىڭ جەلتوقسانىنان باستاپ COVID-19 جۇقتىرعاندار سانى 98,4 مىڭ ادامعا جەتتى. مۇندا كوروناۆيرۋستان 4636 ادام قايتىس بولدى.