قاسكەلەڭدە وزبەكستان ازاماتى تاپا-تال تۇستە وقۋشى قىزعا تاپ بەردى

وقيعا الماتى وبلىسىنىڭ قاسكەلەڭ قالاسىندا بولعان، دەپ حابارلايدى قازاقپارات ءتىلشىسى. «بۇل وقيعا 16 قاراشا كۇندىزگى ساعات 13:00 شاماسىندا قاراساي اۋدانىنىڭ قاسكەلەڭ قالاسىنداعى قاراساي باتىر كوشەسىندە بولعان. وسى جايتقا بايلانىستى پوليتسياعا كومەك سۇراپ حابارلاستى. وقيعا ورنىنا جەتكەندە ءتارتىپ ساقشىلارىنا ايەل ادام ارىزدانىپ، ونىڭ 12 جاسار قىزىنا شامامەن 35-40 جاستاعى ەر ادامنىڭ تاپ بەرگەنىن جەتكىزگەن»، - دەلىنگەن الماتى وبلىستىق پوليتسيا دەپارتامەنتى باسپا ءسوز قىزمەتىنىڭ حابارلاماسىندا.

ۆەدومستۆونىڭ اقپاراتىنا سايكەس، اتالعان فاكتى بويىنشا 39 جاستاعى ەر ادام ۇستالىپ، قاراساي اۋدانىنىڭ پوليتسيا باسقارماسىنا جەتكىزىلدى.

«كامەلەت جاسىنا تولماعان ن. ەسىمدى وقۋشىنىڭ ايتۋى بويىنشا، ول مەكتەپكە بارا جاتقاندا ارتىنان بەلگىسىز ەر ازامات كەلىپ، تاپ بەرىپ، اقشا تالاپ ەتكەن. ءبىراق وقۋشى ودان قۇتىلىپ، قايتا مەكتەپكە قاراي جۇرگەن. ءبىراق سول ەر ازامات ءدال ايالدامانىڭ تۇسىندا وقۋشى قىزعا قايتا تاپ بەرىپ، كۇشپەن ايالدامانىڭ ورىندىعىنا وتىرعىزىپ قويعان. سول ساتتە وزگە ادامدار وقۋشى قىزعا كومەككە كەلىپ، ال تاپ بەرگەن ەر ازامات وقيعا ورنىنان قاشىپ كەتكەن»، - دەلىنگەن ۆەدومستۆونىڭ حابارلاماسىندا.

قازىر اتالعان فاكتى ق ر ق ك 191 بابىنىڭ 24 بابى 3-تارماعى بويىنشا تىركەلدى. تەرگەۋ بارىسىندا قاجەتتى ساراپتامالار تاعايىندالادى.

«ۇستالعان ەر ادام - وزبەكستان ەلىنىڭ ازاماتى. ول 30 تاۋلىككە قاماۋعا الىندى»، - دەپ تولىقتىردى پوليتسيانىڭ باسپا ءسوز قىزمەتى.

ايتا كەتەيىك، بەلگىسىز ازاماتتىڭ وقۋشى قىزعا تاپ بەرگەن ءساتى بەينەباقىلاۋ كامەراسىنا جازىلعان.

اۆتور: سامال قابىشەۆا