وتىرىك كۇلۋدىڭ ءوزى ادامعا پايدالى
نۇر- سۇلتان.قازاقپارات - جاي كۇلۋدىڭ ءوزى ادامعا پايدالى ەكەن. كۇلكى ادام پسيحيكاسىنا وڭ اسەر ەتىپ، كۇيزەلىسى مەن ۋايىمىن باسادى.
ءتىپتى، وتىرىك كۇلكىنىڭ ءوزى سونداي قاسيەتى بار. وسىلاي دەيدى وكسفورد ۋنيۆەرسيتەتىنىڭ زەرتتەۋشىلەرى.
كۇلكىنىڭ ادامعا پايدالى ەكەنى بەلگىلى. مۇنى ەشكىم جوققا شىعارا المايدى. ىشىندە قايعىسى مەن ۋايىمى بار ادامنىڭ كۇلە الماسى تاعى انىق. ءبىراق وكسفورد ۋنيۆەرسيتەتىنىڭ زەرتتەۋشىلەرى ىشتەن تۇنجىراپ جۇرگەنشە، از دا بولسا كۇلىپ جۇرگەننىڭ پايداسى الدەقايدا كوپ دەيدى.
«ويتكەنى زەرتتەي كورسەتكەندەي، ادام كۇلگەن ساتتە كەۋدە بۇلشىق ەتى جيىرىلىپ، ونىڭ ديافراگمالىق بەلسەندىلىگى ارتادى دا وكپەگە اۋانىڭ كىرىپ- شىعۋى جەڭىلدەيدى. ال بۇل ءوز كەزەگىندە ميدا باقىت گورمونىن - ەندورفيندى ءبولۋدى بەلسەندى ەتەدى»، - دەپ تۇسىندىرەدى زەرتتەۋشىلەر.
ال قانعا تۇسكەن ەندورفين ادامعا جاعىمدى ەموتسيا سىيلاپ، بويىن ارام ويلاردان جەڭىلدەتەدى. ەندورفيننىڭ تاعى ءبىر قاسيەتى - كورتيزول سىندى كۇيزەلىس گورمونىن باسۋعا قابىلەتتى. ءارى ميدا ازوت وكسيدىن بولۋگە كومەكتەسەدى. ال ول بۇلشىق ەتتىڭ بوساڭسىپ، اعزانىڭ انتيسترەستىك قابىلەتىنىڭ كۇشەيۋىنە ىقپال ەتەدى.
ازوت وكسيدى قان تامىرلارىن كەڭەيتۋگە قابىلەتتى. سودان ادامنىڭ قان قىسىمعا شالدىعۋى ازايادى. سوندىقتان كۇلكى ارتەريالدى قان قىسىمىنان ادا ەتەدى دەسەك بولادى.
