اتىراۋ ايالداماسىنداعى ستۋدەنتتەردىڭ بۇزاقىلىعى جۇرتتى اشۋلاندىردى

ۆيدەوعا پىكىر بىلدىرۋشىلەر جاسوسپىرىمدەر مەن ولاردىڭ اتا-انالارىن تاۋىپ، ايىپپۇل سالۋعا شاقىردى.

«جابايىلار! ايىپپۇل سالۋ كەرەك». «جارتاستاعى سۋرەتتەر. پالەوليت. ب. ز. د. 4000 مىڭ جىل». «وزدەرىنە تازارتۋ كەرەك!». «ماڭدايىما جازۋدى ۇمىتىپ كەتىپپىن». «تىلىمەن تازالاسىن». «اتا- انالارىنا دۇرىستاپ ايىپپۇل سالۋ كەرەك!! بالالارىن تاربيەلەسىن». «اتا-انالارعا ايىپپۇل سالۋ دەگەنگە قارسىمىن. بالالاردى قالانىڭ بارلىق ايالداماسىن جۋۋعا ماجبۇرلەۋ كەرەك، مەنىڭ ويىمشا، كەلەسىدە سۋرەت سالعىسى كەلمەيتىن بولادى. جاستاردىڭ بويىندا قۇندىلىق جوق».

بۇل وقيعا تۋرالى اتىراۋ وبلىستىق پوليتسيا دەپارتامەنتىندە تۇسىنىك بەرىلدى.

«12-قاراشادا اتىراۋ قالاسىندا 15-16 جاستاعى ەكى جاس ءوسپىرىم جىلى ايالدامالاردىڭ ءبىرىنىڭ قابىرعاسىنا Instagram اككاۋنتىنداعى ءبىرقاتار جازبالاردى جازۋ ارقىلى قوعامدىق ورىنعا زيان كەلتىردى. وسى جاعدايدىڭ ۆيدەوسى الەۋمەتتىك جەلىدە تارالدى. پوليتسەيلەر ىزدەستىرۋ شارالارىن جۇرگىزدى، ولار اتىراۋ بيزنەس جانە قۇقىق كوللەدجىنىڭ ستۋدەنتتەرى بولىپ شىقتى. بالالارمەن پروفيلاكتيكالىق اڭگىمە جۇرگىزىلدى. وقۋ ورنىنا جاسوسپىرىمدەردىڭ زاڭدى وكىلدەرى شاقىرىلدى»، - دەپ حابارلادى اتىراۋ وبلىسى پ د.

سونداي-اق، ق ر اكىمشىلىك قۇقىق بۇزۋشىلىق تۋرالى كودەكسىنىڭ 448-بابىنا سايكەس «16 جاسقا دەيىنگى كامەلەتكە تولماعاندار جاساعان بۇزاقىلىق، ياعني مەملەكەت قورعايتىن ۇيلەردى، وزگە دە قۇرىلىستاردى، جازبالاردى نەمەسە سۋرەتتەردى قورلاۋ، سونداي-اق وزگە دە قوعامدىق ورىنداردا مۇلىكتى قاساقانا ءبۇلدىرۋ» حاتتاماسى تولتىرىلدى.

قوعامدىق ءتارتىپتى بۇزۋشىلاردىڭ ءبىرى - 15 جاستاعى ءبىرىنشى كۋرس ستۋدەنتى. كوللەدج ديرەكتورىنىڭ ورىنباسارى نازەركە قوجابايەۆانىڭ ايتۋىنشا، ستۋدەنتكە قاتىستى وقۋ ورنىندا پروفيلاكتيكالىق اڭگىمەدەن باسقا ناقتى شارالار قابىلدانباعان. «مۇنى سوت شەشەدى»، - دەپ ءتۇسىندىردى قوجابايەۆا.

بۇل وقيعاعا بايلانىستى ماتەريالدار اتىراۋ وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىنا جولداندى.