شورتاندىدا گاز باللونىنىڭ جارىلۋى سەبەپتەرى انىقتالدى

كوكشەتاۋ. قازاقپارات - شورتاندى كەنتىندەگى ءۇش پاتەرلى ۇيدە گاز باللونىنىڭ جارىلۋىنا ءورت قاۋىپسىزدىگى ەرەجەسىنىڭ ساقتالماۋى سەبەپ بولعان.

بۇل تۋرالى بريفينگىدە اقمولا وبلىستىق ت ج د باستىعىنىڭ ورىنباسارى ماناربەك شاپاعاتوۆ ءمالىم ەتتى، دەپ حابارلايدى قازاقپارات ءتىلشىسى.

«الدىن الا انىقتالعانداي، ءورتتىڭ شىعۋىنا قاراپايىم ءورت قاۋىپسىزدىگى، ياعني گاز قۇرىلعىسىن پايدالانۋ ەرەجەسىنىڭ ساقتالماۋى سەبەپ بولعان. قازىرگى كەزدە ساراپتاما تاعايىندالىپ، زەرتتەلۋدە. جارىلىس سالدارىنان تۇرعىن ءۇيدىڭ شاتىرى مەن پاتەرلەردى ءبولىپ تۇراتىن ىشكى قابىرعالار وپىرىلىپ ءتۇستى. گاز باللونى جارىلعان پاتەردە ءبىر وتباسى تۇرعان. سول كۇنى وندا قوناق شاقىرىلعان. زارداپ شەككەندەردىڭ بارلىعى سول ءۇيدىڭ تۇرعىندارى ەمەس، اراسىندا بالالارىمەن بىرگە قوناققا كەلگەندەر دە بار. كورشى پاتەردەگى ادامدار زارداپ شەككەن جوق. ولارعا تەك ماتەريالدىق شىعىن كەلدى»، - دەدى ماناربەك شاپاعاتوۆ.

ەسكە سالا كەتسەك، كەشە شورتاندى كەنتىندە باراك ءتيپتى ءۇش پاتەرلى ۇيدە گاز باللونى جارىلدى.

وقىس وقيعا تۋرالى حابارلاما ءورت ءسوندىرۋ بولىمىنە ساعات 21:38-دە كەلىپ تۇسكەن. ءورتتى سوندىرۋگە ت ج د- نىڭ 35 قىزمەتكەرى مەن 7 تەحنيكاسى، «جەر انا» ج ش س م ە و ق ق- نىڭ 4 قىزمەتكەرى مەن 1 تەحنيكاسى جۇمىلدىرىلعان. قازىرگى مالىمەت بويىنشا، ءۇيىندىنىڭ استىنان ءۇش ادامنىڭ دەنەسى تابىلدى، ونىڭ بىرەۋى كامەلەتتىك جاسقا تولماعان بالا. سونىمەن بىرگە، ءتۇرلى دەڭگەيدەگى دەنە كۇيىگىمەن 10 ادام اۋرۋحاناعا جاتقىزىلدى، ونىڭ ىشىندە بالالار بار. كەيبىر زارداپ شەككەندەردىڭ جاعدايى اۋىر.

اۆتور: اسلان وسپانوۆ