ۆاكسينا العان انا: ەكپە جارنامالايتىن ءدارى ەمەس، دەنساۋلىق ءۇشىن قاجەت

وسى ورايدا ەمىزۋلى انا ەكپە العاننان كەيىنگى ءوز اسەرىمەن ءبولىستى، دەپ حابارلايدى قازاقپارات ءتىلشىسى.

«مەن جاس انامىن 2 ايلىق بالام بار. نەگىزى ۆاكسينانى جۇكتى كەزىمدە العىم كەلگەن، وعان رۇقسات بولمادى. سوسىن بىزگە Pfizer اكەلەدى دەگەننەن كەيىن ەكپە سالدىرام دەپ ناقتى شەشتىم. مىنە بۇگىن العاشقىلاردىڭ ءبىرى بولىپ ۆاكسينا الىپ وتىرمىن. ءدال قازىر ءوزىمدى جاقسى سەزىنىپ تۇرمىن، كەرى اسەرى بايقالمايدى. مەن ۆاكسينا الۋعا جۇكتى كەزىمنەن دايىندالىپ ءجۇردىم، تەك رۇقساتتىڭ بەرىلۋىن كۇتىپ ءجۇردىم. سوندىقتان ەشقانداي سەنىمسىزدىك، ۇرەي جوق. ونىڭ ۇستىنە وتباسىمدا مەنەن باسقاسىنىڭ ءبارى ەكپە العان. جانە مەن ءۇشىن قانداي ۆاكسينا سالدىرعانىم ماڭىزدى ەمەس، ماڭىزدىسى ونىڭ تيىمدىلىگى. بىزگە Pfizer- ءدى سالۋعا رۇقسات دەدى. تيىسىنشە مەن سول ۆاكسينانى الدىم»، - دەدى گۇلفايرۋز ىسقاقوۆا.

سونداي-اق، جاس انا قوعامدا ۆاكسينا توڭىرەگىندەگى الىپ-قاشپا اڭگىمەلەرگە قاتىستى پىكىر ءبىلدىردى.

«ءوز باسىما كەلسەم، مەنى ەشكىم ماجبۇرلەگەن جوق. ءوز ەركىممەن الدىم. سەبەبى مەنىڭ وتباسىم، جاقىندارىمنىڭ بارلىعى العان، سوندىقتان مەن دە ەكپە سالدىرۋىم كەرەك دەپ شەشتىم. ۆيرۋس تەز تارايدى، مەنىڭ ۇلكەن اتا-انام بار، مەنىڭ بالالارىم بار. مەن سولاردى ويلايمىن. ودان بولەك، ادامدا قوعام الدىنداعى جاۋاپكەرشىلىك بولۋ كەرەك. اينالامداعىلاردىڭ ءبارى ۆاكسينا الىپ ىندەتتەن ساقتانىپ جاتقاندا، مەن نەگە قالىس قالۋىم كەرەك. جانە مەن باسقا انالارعا ۆاكسينا الۋعا كەڭەس بەرەمىن، ءبىراق بىرەۋدى ماجبۇرلەپ كوندىرۋدەن اۋلاقپىن. اركىمنىڭ ەركى مەن سانا-سەزىمى بار. بۇگىندە بارلىق مەملەكەت حالقىنىڭ تولىقتاي ۆاكسينا الۋى ءۇشىن بار كۇشىن سالىپ جاتىر. ەكپە جارنامالايتىنداي ءدارى ەمەس، بۇل الدىمەن دەنساۋلىق ءۇشىن قاجەت. ونىڭ ۇستىنە تيىمدىلىگى عىلىمدا دالەلدەنگەن»، - دەيدى ول.

ايتا كەتەيىك، بۇگىن ەلوردادا Pfizer ۆاكسيناسىن سالۋ پروتسەسى باستالدى. ەكپەنى العاش بولىپ 17 جاستاعى استانالىق جاس ءوسپىرىم سالعىزدى. ودان بولەك، قالالىق قوعامدىق دەنساۋلىق ساقتاۋ باسقارماسىنان ۆاكسينا العىسى كەلەتىن جۇكتى ايەلدەر مەن ەمىزۋلى انالاردىڭ قاتارى كوپ ەكەنى حابارلاندى.