ەلىمىزدە تۇرمىستىق زورلىق- زومبىلىق ءورشىپ تۇر
بۇل تۋرالى ق ر ىشكى ىستەر مينيسترلىگى اكىمشىلىك پوليتسيا كوميتەتى باسقارماسىنىڭ باسشىسى جاسۇلان بايكەنوۆ ايتتى، دەپ حابارلايدى قازاقپارات ءتىلشىسى.
«زورلىق- زومبىلىق - بۇل داۋلى الەۋمەتتىك پروبلەما، ويتكەنى ول قۇربانداردىڭ وزدەرىنە تىكەلەي اسەر ەتىپ قانا قويمايدى، سونىمەن بىرگە قوعامدى تۇراقسىزداندىرادى، الەۋمەتتىك تارتىپكە قاۋىپ توندىرەدى. زورلىق- زومبىلىقتىڭ ەڭ كوپ تارالعان تۇرلەرىنىڭ ءبىرى - تۇرمىستىق زورلىق- زومبىلىق. جىل باسىنان بەرى تۇرمىستىق زورلىق- زومبىلىق جايىندا 125 مىڭنان استام شاعىم مەن حابارلاما كەلىپ ءتۇستى»، - دەدى ج. بايكەنوۆ ونلاين بريفينگىدە.
ونىڭ ايتۋىنشا، وسى فاكتىلەردى قاراستىرۋ كەزىندە 9645 ادامعا قاتىستى سوت ولاردىڭ تارتىبىنە ەرەكشە تالاپتاردى بەكىتتى. 40 مىڭنان استام ادام اكىمشىلىك جاۋاپكەرشىلىككە تارتىلدى. «جابىرلەنۋشىلەردىڭ قاۋىپسىزدىگىن قامتاماسىز ەتۋ ماقساتىندا 70228 ادامعا قورعاۋ تۋرالى نۇسقاۋ بەرىلدى»، - دەدى باسقارما باسشىسى.
اۆتور: رۋسلان عابباسوۆ
