ءبىر اپتادا ەلىمىزدە قانشا قىلمىس تىركەلگەنى ايتىلدى
بۇل تۋرالى ىشكى ىستەر مينيسترلىگىنىڭ وكىلى شۇعىلا تۇرلىبەك ايتتى، دەپ حابارلايدى قازاقپارات ءتىلشىسى.
«ەلدەگى كريمينوگەندىك جاعدايعا توقتالساق، ءبىر اپتا ىشىندە 3230 قىلمىس جاسالدى، ونىڭ 2247 ى تاۋلىك ىشىندە اشىلدى»، - دەدى شۇعىلا تۇرلىبەك ىشكى ىستەر مينيسترلىگى ۇيىمداستىرعان اپتالىق بريفينگىدە.
سونىمەن قاتار، پوليتسيا قىزمەتكەرلەرى «ءىزىن سۋىتپاي» 10 كىسى ءولتىرۋدى، 4 ولىمگە اكەپ سوققان دەنساۋلىققا قاساقانا اۋىر زيان كەلتىرۋدى، ءبىر قاراقشىلىق، 28 توناۋ جانە 475 بوتەن مۇلىكتى ۇرلاۋ قىلمىستارىن اشتى.
بۇدان بولەك بريفينگىدە ىشكى ىستەر ءمينيسترى ەرلان تۇرعىمبايەۆتىڭ پارلامەنت ماجىلىسىندەگى ۇكىمەت ساعاتىندا كوتەرگەن ماسەلەلەرى جايىندا ايتىلدى. ول دەپۋتاتتىق كورپۋسقا رەسپۋبليكاداعى قىلمىستىق جاعداي تۋرالى بايانداپ، بۇرىن سوتتالعاندارمەن، كامەلەتكە تولماعاندارمەن، ماس كۇيىندە، قارۋدى قولدانا وتىرىپ جاسالعان قىلمىستاردىڭ تورتتەن ءبىر بولىككە ازايعانىن، مۇنداي قىلمىستاردىڭ اشىلۋىنىڭ جاقسارعانىن اتاپ ءوتتى جانە اتالمىش وڭ ءۇردىستىڭ سوڭعى 3 جىل بويى ساقتالىپ كەلە جاتقانىن حابارلادى. سونىمەن قاتار، ينتەرنەت- الاياقتىق سانىنىڭ وسۋىنە نازار اۋدارىلدى.
اۆتور: رۋسلان عابباسوۆ
