تاۋ تۇلعالار تۋرالى تۋىندى

ايشىقتى جوبا شەبەردىڭ تۋعانىنا 80 جىل تولۋىنا جانە ەل تاۋەلسىزدىگىنىڭ 30 جىلدىعىنا ارنالىپ وتىر.

كورمە كەيىپكەرى، ەڭ الدىمەن، بەينەنىڭ ەپيكالىق كۇشى ءومىردىڭ وتپەلى ساتتەرىنىڭ رومانتيكالىق سەزىمدەرىمەن ۇيلەسەتىن مونۋمەنتالدى جۇمىستارىمەن تانىمال. ءبىزدىڭ كوڭىلىمىزگە قاتتالعان اۋەزوۆ بەينەسى، ءال- فارابي مەن اباي تۇلعاسى، ت. جۇرگەنوۆ ەسكەرتكىشى سەرگەبايەۆ قولتاڭباسىن ايگىلەگەن ءتول تۋىندىلار. قوندىرعىلى پلاستيكا سالاسىندا ءونىمدى ەڭبەك ەتكەن ونىڭ شىعارماشىلىق جولى ءومىرىن ونەرمەن ورگىسى كەلگەندەرگە اينىماس ۇلگى.

ءمۇسىنشىنىڭ بەلسەندى شىعارماشىلىق قىزمەتى 60-جىلدارى، قازىرگى زاماننىڭ قاجەتتىلىكتەرىنە جاۋاپ بەرەتىن، بويىنا وبرازدىڭ استارلى ءمانىن، ەپيكاسى مەن اللەگورياسىن بىرىكتىرەتىن جاڭا كوركەمدىك ءستيلدى قالىپتاستىرۋدى ماقسات ەتكەن، كەڭەستىك ونەرگە تالانتتى سۋرەتشىلەر مەن مۇسىنشىلەردىڭ جاڭا بۋىنى كەلگەن كەزدە باستالدى. ە. سەرگەبايەۆتىڭ ەرتەرەكتەگى «س. ايتبايەۆتىڭ پورترەتى» (1967) ، «اباي» (1968) ، «زامانداستىڭ پورترەتى» (1972) كومپوزيتسيالارى فورماسىنىڭ جالپىلىعىمەن، سۇلبانىڭ ورنىقتىلىعىمەن جانە تۇتاستىعىمەن، ىشكى ەنەرگەتيكاسىمەن جانە اۆتوردىڭ زىمىراعان ۋاقىت سەزىمىن، اكەلەر مەن بالالار اراسىنداعى رۋحاني ساباقتاستىقتىڭ ماڭىزدىلىعىن جەتكىزۋگە ۇمتىلىسىمەن ەرەكشەلەنەدى. 80-جىلدارداعى ەڭبەكتەرىندە شەبەر مونۋمەنتالدى ستيلگە، وتكەن مەن بۇگىندى فيلوسوفيالىق پايىمداۋعا بەت بۇرادى.

ەسكەن سەرگەبايەۆ 1940 -جىلى 19-مامىردا الماتىدا دۇنيەگە كەلدى. ن. گوگول اتىنداعى كوركەمسۋرەت ۋچيليشەسىندە ن. جۋراۆليەۆتەن ءتالىم الدى. 1969 -جىلى ي. رەپين اتىنداعى لەنينگراد كەسكىندەمە، ءمۇسىن جانە ساۋلەت ينستيتۋتىنىڭ ءمۇسىن فاكۋلتەتىن ءبىتىردى. 1960 -جىلدان قازاق ك س ر كوركەمسۋرەت قورىندا جۇمىس ىستەدى، ال 1974 -جىلدان «ونەر» كوركەمسۋرەت كومبيناتىندا باس سۋرەتشى بولدى.

كوركەمونەر اكادەمياسىنىڭ تولىق مۇشەسى ە. سەرگەبايەۆ وقىتۋشىلىق قىزمەتتى بەلسەندى اتقارىپ كەلەدى. 1969 -جىلدان باستاپ ن. گوگول اتىنداعى الماتى كوركەمسۋرەت ۋچيليشەسىندە، ال 1978 -جىلدان تەاتر جانە كوركەمسۋرەت ينستيتۋتىندا وقىتۋشى، كەيىننەن دوتسەنت بولىپ جۇمىس ىستەدى. 2010 -جىلدان باستاپ قازىرگى ۋاقىتقا دەيىن ە. سەرگەبايەۆ ت. جۇرگەنوۆ اتىنداعى قازاق ۇلتتىق ونەر اكادەمياسىندا ءمۇسىن كافەدراسىنىڭ مەڭگەرۋشىسى، پروفەسسورى قىزمەتىن اتقارادى.

ەكسپوزيتسياعا اۆتوردىڭ ءا. قاستەيەۆ اتىنداعى ونەر مۋزەيى قورىندا جانە ءوز شەبەرحاناسىندا ساقتالعان ءار جىلدارداعى 70 شىعارماسى ەنىپ وتىر. تاۋەلسىزدىك تويىنا ارنالعان رۋحاني جوبا جەلتوقسان ايىنىڭ ورتاسىنا دەيىن جالعاسادى.

ارمان وكتيابر

egemen.kz