پاۆلوداردا ءىنجىر جەمىس بەردى

نۇر-سۇلتان.قازاقپارات - پاۆلوداردا جاس ەكولوگتار تىڭ باستاما كوتەردى. وقۋشىلار جىلىجايدا وسەتىن تروپيكالىق جانە سۋبتروپيكالىق جەمىستەر تۋرالى قىزىقتى مالىمەتتەر جيناپ، ولاردى كۇتىپ باپتاۋ سىرىن اشادى.

العاشقى تانىمدىق ساباق ءىنجىر مەن فورتۋنەللاعا ارنالدى. جىلىجاي مەڭگەرۋشىسى احمەت قاپاشيەۆ ۇزاق جىلدار بويى وقۋشىلاردى وسىمدىك تانۋعا باۋلىپ كەلەدى. ءار اعاشتىڭ وزىندىك ەرەكشەلىگى بار. ماسەلەن، كيۆي شىرماۋىق سياقتى ورمەلەپ وسەدى. ال ءىنجىر اعاشىنىڭ گۇلى جەمىسىنىڭ ىشىندە بولادى. ەكزوتيكالىق جەمىس اعاشتارى جىل بويى گۇلدەپ تۇرادى. سولاردىڭ ءبىرى جاپون فورتۋنەللاسى.

احمەت قاپاشيەۆ، جىلىجاي مەڭگەرۋشىسى:

- ءوز ەلىندە بۇلار ءوز وتانىندا جىل بويى گۇلدەپ تۇراتىن وسىمدىكتەردىڭ قاتارىنا جاتادى. تروپيكالىق وسىمدىكتىڭ ءبىر قاسيەتى. فورتۋنەللانى بىزدە، ءبىزدىڭ دۇكەندەردە كينكان، كۋمكۆات دەگەن اتپەن كەزدەستىرۋگە بولادى جەمىسىن. شىنىنا كەلگەندە، بوتانيكالىق اتى فورتۋنەللا.

ەكولوگيالىق مەكتەپتىڭ جىلىجايىندا ليمون، اۆوكادو، كيۆي، انار، لاۆر جانە كوفە سىندى 180 گە جۋىق تروپيكالىق جەمىس اعاشتارى ءوسىپ تۇر. بيجان ءامىرحانوۆ ءىنجىر اعاشى تۋرالى كوپتەگەن مالىمەت جيناپتى. ءىنجىر تروپيكالىق ورمانداردا وسەتىن ماڭگى جاسىل فيكۋستىڭ تۋىسى بولىپ كەلەدى. ونى شاراپ جيدەگى، كاريك فيكۋسى دەپ تە اتايدى ەكەن.

بيجان ءامىرحانوۆ، وقۋشى:

- ءىنجىر جەمىستەرى ءارتۇرلى تۇستەردە بولادى. اشىق جاسىلدان قويۋ كۇلگىنگە شەيىن، ءبىراق ونىڭ ىشىندەگى جۇمساعى ءاردايىم قىزعىلت- قىزىل بولادى جانە ونىڭ تۇقىمدارى كوپ بولادى. اعاشتان ۇزىلگەن جەمىس بىرنەشە ساعات بويى ساقتالادى سودان كەيىن اشۋ پروتسەسى باستالادى. وقۋشىلار ءوز قاتارلاستارىنا تاڭعاجايىپ وسىمدىك - ءىنجىردى ءۇي جايىندا قالاي وسىرۋگە بولاتىنىن ۇيرەتپەك.

جالپى جىلىجايدا وسىمدىكتەر تۇقىمىنان وتىرعىزىلادى. بۇل جەمىس اعاشتارىنىڭ قالاي ءوسىپ جەتىلەتىنىن باقىلاۋ ءۇشىن كەرەك. ال ەكولوگيالىق ورتالىقتا ەكزوتيكالىق وسىمدىكتەردەن بولەك گۇلدەردىڭ 80 گە تارتا ءتۇرى بار.

قارلىعاش قاسيەتوۆا، سامات وسپانوۆ، مارات يگىلىكوۆ

www.24.kz