ەلوردادا قوعامدىق كولىككە ماسكاسىز مىنگەن جولاۋشىلارعا ايىپپۇل سالۋ ۇسىنىلدى
نۇر-سۇلتان. قازاقپارات - نۇر-سۇلتان قالاسىندا قوعامدىق كولىككە ماسكا تاقپاي مىنەتىن جولاۋشىلاردى جاۋاپكەرشىلىككە تارتۋ كەرەكتىگى ايتىلدى.
بۇل تۋرالى CTS (City Transportation Systems) ج ش س-نىڭ باسقارما ءتوراعاسى بەكمىرزا يگەنبەردينوۆ ءمالىم ەتتى، دەپ حابارلايدى قازاقپارات ءتىلشىسى.
«ەلوردانىڭ اۆتوبۋس پاركتەرى سانيتارلىق تالاپتاردى جوسپارعا ساي جۇرگىزىپ وتىر. اۆتوبۋستا ماسكا تاقپايتىن جولاۋشىلاردىڭ ماسەلەسىن زاڭ اياسىندا شەشۋ كەرەك دەپ ويلايمىن. شەتەل تاجىريبەسىنە سۇيەنىپ، ماسكا تاقپاعان جولاۋشىلارعا ايىپپۇل سالۋ قاجەت»، - دەدى بەكمىرزا يگەنبەردينوۆ تىلشىلەردىڭ سۇراعىنا جاۋاپ بەرە تۇرىپ.
ونىڭ ايتۋىنشا، اۆتوبۋس جۇرگىزۋشىسى مەن باقىلاۋشى ماسكا تاعۋ تۋرالى جولاۋشىلارعا ۇنەمى ەسكەرتىپ وتىرادى.
«تالاپ زاڭمەن بەكىتىلگەن كەزدە، ماسكاسىز جولاۋشىلاردىڭ سانى ازايىپ، ماسەلە وڭ شەشىمىن تابادى دەگەن ويدامىز»، - دەيدى ول. بۇعان دەيىن CTS (City Transportation Systems) باسشىسى ەلوردانىڭ قوعامدىق كولىكتەرىندە Ashyq جۇيەسى ەنگىزىلە مە دەگەن ساۋالعا قاتىستى پىكىر ءبىلدىردى. سونداي- اق، نۇر-سۇلتان قالاسىندا قوعامدىق كولىك اقىسىن تولەۋدىڭ جاڭا جۇيەسى ەنگىزىلەتىنى حابارلاندى. ودان بولەك، ەلوردادا قوعامدىق كولىك اقىسىن تولەمەي جۇرەتىن جولاۋشىلاردىڭ ۇلەسى تۋرالى ايتىلدى.
اۆتور: ءالي يبرايەۆ
