ريەۆاكسيناتسيا: الماتى اكىمى باقىتجان ساعىنتايەۆ قاي ەكپەنى سالدىردى؟

تىكەلەي ەفير بارىسىندا قالا تۇرعىنى اكىمنەن ريەۆاكسيناتسيادا قانداي ەكپەنى سالدىرعان دۇرىس دەپ سۇرادى.

«سىزگە دارىگەرلەرمەن كەڭەسۋ كەرەك دەپ ويلايمىن. مەن «سپۋتنيك V» ۆاكسيناسىن قايتا سالدىردىم. مەن ۆاكسينانىڭ وسى ءتۇرىن تاڭدادىم. جانە سونداي شەشىم قابىلدادىم. سەبەبى، «سپۋتنيك V» ۆاكسيناسىنىڭ ءبىرىنشى كومپونەنتى مەن ەكىنشى كومپونەنتىن العانمىن. مەنىڭ اعزام وسى ۆاكسينانى جاقسى قابىلدادى. ءۇشىنشى دوزادان كەيىن دە ءوزىمدى جاقسى سەزىندىم. سوندىقتان بۇل - ءسىزدىڭ شەشىمىڭىز. ءبىرىنشى ۆاكسينادان كەيىن باسقاسىن سالۋعا بولادى دەگەندى ءجيى ەستيمىز. ماماندار بۇعان رۇقسات دەيدى، ءبىراق كەز كەلگەن جاعدايدا دارىگەرىڭىزبەن كەڭەسىڭىز»، - دەپ جاۋاپ بەردى اكىم.

بۇعان دەيىن ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي قازاقستاندا ريەۆاكسيناتسيا 22- قاراشادا باستالاتىنىن ايتقان بولاتىن.