زاڭگەر ب ا ق تۋرالى جاڭا زاڭ ازىرلەۋدى ۇسىنادى
نۇر-سۇلتان. قازاقپارات - قازاقستانعا ب ا ق تۋرالى جاڭا زاڭ كەرەك. زاڭ عىلىمدارىنىڭ كانديداتى، ادۆوكات مەرەكە عابدۋاليەۆ وسىنداي ۇسىنىس ايتتى، دەپ حابارلايدى «قازاقپارات» ح ا ا ءتىلشىسى.
«بىزگە ب ا ق تۋرالى جاڭا زاڭ ازىرلەۋ قاجەت دەگەن ۇسىنىس ايتقىم كەلەدى. ۇسىنامىن. قاجەت بولسا، ءتىپتى تالاپ ەتەمىن. بۇل تۇبەگەيلى جاڭا زاڭ بولۋى ءتيىس. سەبەبى، قازىر ب ا ق پەن جۋرناليستەر سيفرلىق ءداۋىر دەيتىن جاڭا ساپالىق ولشەمدە جۇمىس ىستەپ جاتىر. بۇل جاعدايدا ءبىز ينتەرنەتتىڭ دامۋىن، ءارتۇرلى كوزدەردەن اقپارات الۋ مۇمكىندىگىن ەسكەرۋىمىز كەرەك. بۇل جاعدايدا ءبىز جۋرناليستىڭ قۇقىقتىق مارتەبەسىن، ونىڭ قۇقىقتارى مەن مىندەتتەرىن، كاسىبي دەڭگەيدەگى جاۋاپكەرشىلىگىن ايقىنداۋىمىز كەرەك»، - دەدى مەرەكە عابدۋاليەۆ بۇقارالىق مەديانى زاڭنامالىق رەتتەۋ تۋرالى كونفەرەنسيا اياسىندا جۋرناليستەرگە بەرگەن سۇحباتىندا.
سونداي-اق، ول قازىر جۋرناليستەردى قۋدالاۋدىڭ ءتۇرلى زاڭنامالىق تەتىكتەرى كوپ ەكەنىن اتادى.
«مەن جۋرناليستەردىڭ ويدان شىعارىلعان نەگىزدەر بويىنشا قىلمىستىق قۋدالاۋعا تارتىلۋىنا قارسىمىن. وقيعا ورنىنان حابار تاراتۋعا كەلگەن جۋرناليستەر پوليتسيا بولىمشەسىنە ءجيى جەتكىزىلەتىن بولىپ ءجۇر. ونىڭ سوڭى كەيدە جۇمىستان شىعارۋعا دەيىن بارادى. بۇعان جول بەرىلمەۋى كەرەك»، - دەدى زاڭگەر.
ونىڭ ايتۋىنشا، ب ا ق تۋرالى قولدانىستاعى زاڭ قۇرامدى نورماتيۆتەردەن قۇرالعان. سوندىقتان ونى ءبىرتۇتاس قۇجات ەتىپ قابىلداعان ءجون.
«ب ا ق تۋرالى زاڭعا ۇنەمى وزگەرىستەر ەنگىزىلىپ كەلەدى. قازىر سونىڭ سالدارىنان ول قۇراق كورپەگە ۇقساپ كەتكەن. ءبىز بۇعان باسقاشا قاراۋىمىز كەرەك. ءبىز بۇگىن العان ۇسىنىستاردى شوعىرلاندىرۋ قاجەت. ءبىز بۇل ماسەلەگە زاڭدا قانداي باپتاردى اۋىستىرۋ كەرەك دەگەن تۇرعىدان ەمەس، ب ا ق پەن جۋرناليستەردىڭ مارتەبەسىن ايقىنداۋ تۇرعىسىنان كەلۋىمىز كەرەك. وسىعان سۇيەنە وتىرىپ، تۇبەگەيلى جاڭا زاڭ ازىرلەۋ قاجەت»، - دەدى ادۆوكات.
