پرەزيدەنت ءوڭىرارالىق قونىس اۋدارۋدى ىنتالاندىرۋ ءىس- شاراسىن ازىرلەۋدى جۇكتەدى
ەكىباستۇز. قازاقپارات - مەملەكەت باسشىسى قاسىم- جومارت توقايەۆ دامۋ الەۋەتى تومەن مونوقالا تۇرعىندارىنىڭ ءوڭىرارالىق قونىس اۋدارۋىن ىنتالاندىرۋ ءىس- شاراسىن ازىرلەۋ قاجەتتىگىن ايتتى، دەپ حابارلايدى قازاقپارات ءتىلشىسى.
«دامۋ الەۋەتى تومەن شالعايداعى مونوقالالار تۇرعىندارىنىڭ وبلىسىشىلىك جانە ءوڭىرارالىق قونىس اۋدارۋىنا قاتىستى ىنتالاندىرۋشى ءىس- شارالار قاجەت. ۇكىمەتكە وڭىرلەردى دامىتۋ جونىندەگى ۇلتتىق جوبا اياسىندا دامۋ الەۋەتى تومەن مونوقالالاردى كوشىپ كەتۋ وڭىرلەرى قاتارىنا قوسۋدى تاپسىرامىن»، - دەدى قاسىم- جومارت توقايەۆ ەكىباستۇزدا ءوتىپ جاتقان مونوقالالاردى دامىتۋ ماسەلەلەرىنە ارنالعان جينالىستا.
اقوردانىڭ Twitter- دەگى مالىمەتىنە سايكەس، پرەزيدەنت بۇل باستاما ازاماتتاردىڭ بولاشاعى بار قالالارعا ءوز ەركىمەن قونىس اۋدارۋىنا سەبەپ بولاتىنىن اتاپ وتكەن.
«بۇل ازاماتتاردىڭ مامانداردى قاجەت ەتىپ وتىرعان بولاشاعى بار، ءوسىپ كەلە جاتقان قالالارعا ءوز ەركىمەن قونىس اۋدارۋىن ىنتالاندىرادى. ونەركاسىپتىك مونوقالالار تۇرعىندارىنىڭ باسىم بولىگى قاجەتتى جۇمىسشى جانە ينجەنەرلىك ماماندىقتاردا بىلىكتىلىگى مەن تاجىريبەسى بار ەكەندىگىن جاقسى بىلەمىز»، - دەدى مەملەكەت باسشىسى.
اۆتور: مارلان جيەمباي
