الماتىدا «ءاليحان بوكەيحانوۆ. ءداۋىر ادامى» كىتابىنىڭ تۇساۋكەسەرى ءوتتى

كىتاپ اۆتورى رەسەيلىك ازامات، تاريح عىلىمدارىنىڭ دوكتورى، پروفەسسور، ءسىبىر باسقارۋ جانە بۇقارالىق كوممۋنيكاتسيالار اكادەمياسىنىڭ تەڭ قۇرىلتايشىسى جانە رەكتورى ۆيكتور يۆانوۆيچ كوزودوي. عالىمنىڭ ايتۋىنشا، الاش قايراتكەرى ءاليحان بوكەيحانوۆ جايلى ەڭبەگىن مۇراعاتتان الىنعان اقپاراتتارعا سۇيەنە وتىرىپ جازعان.

«قازاقستاننىڭ بەلگىلى تاريح ينستيتۋتىندا كىتابىمنىڭ تۇساۋكەسەرىن وتكىزۋ مەن ءۇشىن زور مارتەبە. كىتاپ جازۋداعى باستى ماقساتىم رەسەيلىك وقىرمانداردى قازاقتىڭ اسىل تۇلعاسى ءاليحان بوكەيحانوۆپەن تانىستىرۋ بولدى. كىتاپقا «ءاليحان بوكەيحانوۆ. ءداۋىر ادامى» دەگەن ات قويدىم. نەگە؟ سەبەبى، ءاليحان بوكەيحانوۆتاي تاريحي تۇلعانى ءبىر داۋىرمەن تەڭەستىرۋگە بولادى»، - دەدى ول.

سونداي-اق، كىتاپ اۆتورى الاشوردا ۇكىمەتىنىڭ جەتەكشىسى تۋرالى ءبىرى بىلسە، ءبىرى بىلە بەرمەيتىن دەرەكتەردى دە ءوز تۋىندىسىنا قوسقانىن ايتتى.

ش. ءۋاليحانوۆ اتىنداعى تاريح جانە ەتنولوگيا ينستيتۋتىندا وتكەن سالتاناتتى شاراعا عالىمدار، ساياساتتانۋشىلار، تاريحشىلار، ولكەتانۋشىلار، ب ا ق وكىلدەرى قاتىستى.

شارا بارىسىندا ق ر ۇلتتىق عىلىم اكادەمياسىنىڭ ۆيتسە-پرەزيدەنتى، فيزيكا-ماتەماتيكا عىلىمدارىنىڭ دوكتورى، پروفەسسور ماقسات قاليمولدايەۆ كىتاپ اۆتورىنا قۇرمەت گراموتاسىن تابىستاپ، ۇستىنە شاپان جاپتى.