حالىق ساناعى اياسىندا ناقتىلاۋ جۇمىستارى باستالدى
حالىقتى تولىق ەسەپكە الۋدى جانە 2021 -جىلعى حالىق ساناعىن جۇرگىزۋ كەزىندە دەرەكتەر ساپاسىنىڭ انىقتىعىن تەكسەرۋدى قامتاماسىز ەتۋ باقىلاۋ ءىس- شارالارى جۇرگىزىلەدى.
باقىلاۋ فۋنكسياسى ءاربىر تۇرعىن ۇيگە ينتەرۆيۋەر بارعانىنا جانە ساناق پاراقتارىنىڭ بارلىق تۇراتىن رەسپوندەنتتەرگە تولتىرىلعانىنا كوز جەتكىزۋگە مۇمكىندىك بەرەدى. نۇسقاۋشى- باقىلاۋشىلار ينتەرۆيۋەرلەرمەن بىرگە حالىق ساناعى اياقتالعاننان كەيىن 7 كۇن ىشىندە ءاربىر ەسەپ ۋچاسكەسىندەگى تۇرعىن جايلاردىڭ 10 پروتسەنتىن قامتي وتىرىپ، رەسپوندەنتتەرگە باقىلاپ، ارالاپ شىعۋ جۇرگىزەدى. 1- قاراشاداعى جاعداي بويىنشا ەلدە 19450179 ادام نەمەسە % 102,2 (1- تامىزداعى جاعداي بويىنشا حالىق سانى 19029507 - ءنى قۇراعان) ساناقپەن قامتىلدى.
ەستەرىڭىزگە سالا كەتەيىك، شارا اياسىندا ەلىمىزدە تۇراقتى تۇرىپ جاتقانداردان وزگە 12 ايدان اسا ۋاقىتقا شەتەلگە ىسساپارمەن شىققاندار (شەتەلدەگى ديپلوماتيالىق كورپۋس پەن قر وكىلدىگىنىڭ قىزمەتكەرلەرى مەن ولاردىڭ وتباسى مۇشەلەرى)، كەلىسىمشارت نەگىزىندە ءبىر جىلدان كەم ۋاقىتقا باسقا ەلگە كەتكەن وتانداستارىمىز، وزگە مەملەكەتتە «بولاشاق» باعدارلاماسى اياسىندا ءبىلىم الىپ جاتقان ستۋدەنتتەر، ۋاقىتشا شەتەلگە شىققان تۋريستەر، ۋاقىتشا (12 ايدان از) ەلىمىزدە جۇرگەن شەتەلدىكتەر، ازاماتتىعى جوق ادامدار مەن بوسقىندار ساناقتان وتۋدە.
حالىق ساناعىن وتكىزۋ ادىستەمەسىنە سايكەس، ساۋالناما اياقتالعان سوڭ ناقتى جانە تۇرعىلىقتى حالىق سانى بويىنشا اقپارات الىناتىن بولادى. بۇل ساناتتار نەنى بىلدىرەدى؟
«ناقتى حالىق» دەگەنىمىز، ساناق وتكىزۋ كەزىندەگى بەلگىلى ءبىر ەلدى مەكەندەگى ادامداردىڭ سانىن بىلدىرەدى. بۇل ساناتقا تۇرعىلىقتى تۇرعىندارمەن قاتار، ۋاقىتشا كەلگەندەر مەن رەزيدەنت ەمەس تۇلعالار جاتقىزىلادى. ياعني، مۇندا ەلدى مەكەنگە قوناققا، دەمالۋعا، جۇمىس بابىمەن جانە ت. ب. ماقساتتا، سونداي- اق، ەلدە ۋاقىتشا جۇرگەن شەتەلدىكتەر، ازاماتتىعى جوق ادامدار مەن بوسقىندار قامتىلادى. «تۇرعىلىقتى حالىق» دەگەن ساناتتا ەلدى مەكەندە تۇراقتى تۇرىپ جۇرگەندەرمەن قاتار، ۋاقىتشا باسقا جاققا شىعىپ كەتكەن ازاماتتار قامتىلادى. ولاردىڭ قاتارىنا باسقا ەلدى مەكەنگە نەمەسە شەتەلگە تۋىستارىنا، ەڭبەك دەمالىسىنا، جۇمىس بابىمەن نەمەسە باسقا دا سەبەپتەرمەن ۋاقىتشا كەتكەندەر كىرەدى.
ساناقتان ونلاين ءوتۋ مۇمكىندىگى دە 8 - قاراشاعا دەيىن قولجەتىمدى ەكەنىن اتاپ وتكىمىز كەلەدى. ساناق ساۋالدارىنا ارنايى sanaq.gov.kz سايتى، E- Gov پورتالى نەمەسە Aitu موبيلدى قوسىمشاسى ارقىلى جاۋاپ بەرۋگە بولادى. حالىق ساناعىنىڭ نەگىزگى كەزەڭى اياقتالدى. قاراشانىڭ 8-نە دەيىن ساناق وتكىزۋ ادىستەمەسىنە سايكەس، ناقتىلاۋ شارالارى قاراستىرىلعان. 2021 -جىلعى حالىق ساناعىنىڭ ۇرانى - «قازاقستاندا اركىم ماڭىزدى!».
