تۇركىستان وبلىسىندا قازاقتىڭ داڭىقتى پەرزەنتتەرىنە ەسكەرتكىش ورناتىلدى - فوتو

تۇركىستان. قازاقپارات - تۇركىستان وبلىسى، قازىعۇرت اۋدانىنىڭ ساراپحانا اۋىلىندا الاش ارىستارى مەن قاجىمۇقانعا ارنالعان ەسكەرتكىشتەر ورناتىلدى.

ەڭسەلى ەسكەرتكىشتەر تاۋەلسىزدىكتىڭ 30 -جىلدىعىنا ارنالدى، دەپ حابارلايدى قازاقپارات ءتىلشىسى.

«ماڭگىلىك ەل» كەشەنىندە ورىن تەپكەن ەسكەرتكىشتەر ۇلت ءۇشىن ءومىرىن كۇرەسكە اينالدىرعان كوشباسشىلار مەن قايراتكەرلەردى بەينەلەيدى. سالتاناتتى ءىس-شاراعا ەلىمىزدىڭ تۇكپىر- تۇكپىرىنەن زيالى قاۋىم وكىلدەرى، قوعام قايراتكەرلەرى، تاريحشىلار مەن قالامگەرلەر قاتىستى. اتاپ ايتساق، مامبەت قويگەلدى، قۋانىش ايتاحانوۆ، ساۋىتبەك ءابدىراحمانوۆ، نارماحان بەگالى ۇلى جانە وزگە دە تۇلعالار ءسوز سويلەپ، رۋحاني ماڭىزدى باستامانى جوعارى باعالادى.

مەتسەنات بەكەت تۇرعارايەۆ پەن جەرگىلىكتى اكىمدىكتىڭ ۇيلەسىمدى ىسىنە ريزاشىلىقتارىن ءبىلدىردى. قازىعۇرت اۋدانىنىڭ اكىمى ارمان ابدۋللايەۆ پەن تانىمال ازاماتتار دا جۇرەكجاردى لەبىزدەرىن ورتاعا سالىپ، الاش قايراتكەرلەرى ماڭگىلىك ەلمەن بىرگە ماڭگى جاسايتىنىن ايتتى. سونىمەن بىرگە وسى كۇنى «اناعا تاعزىم» جانە قاجىمۇقان بالۋانعا ارنالعان ەسكەرتكىشتەردىڭ دە اشىلۋ سالتاناتى ءوتتى.

داڭقتى بالۋاننىڭ 150 جىلدىعىنا ارنالعان ەسكەرتكىشكە جانە انانىڭ مەيىرىمى سۋرەتتەلگەن ونەر تۋىندىسىنا قوناقتار وڭ باعاسىن بەردى. بۇل يگى باستاماعا بەلگىلى مەتسەنات بەكەت تۇرعارايەۆ قولداۋ كورسەتكەن بولاتىن.