قىتايمەن شەكاراداعى باياۋ جۇك قوزعالىسى الاڭداتىپ تۇر
تەمىر جولداعى بۇل تۇيتكىل ەندى كاسىپكەرلەرگە اۋىر ءتيىپ تۇر. ال جول شىعىنى ارتا بەرسە، باعا دا وسە تۇسپەك. «شەكاراداعى جۇك ۆاگوندارىنىڭ تەجەلۋى ەلىمىز ءۇشىن قارجىلىق شىعىن» دەگەن ءسوز. بۇدان وتاندىق نارىقتا قىتايدان كەلەتىن تاۋارلاردىڭ باعاسى كۇرت قىمباتتاۋى مۇمكىن ەدى. قازىر دە باعا ءبىر قۇبىلىپ تۇر. جاعدايدى تۇراقتاندىرۋ ءۇشىن ەكى ەلدىڭ ۇكىمەت باسشىلارى ءوزارا كەلىسسوز جۇرگىزىپ، ءبىر مامىلەگە كەلگەن ەدى.
قانات كوبەسوۆ، «ق ت ج- جۇك تاسىمالى» ج ش س باس ديرەكتورىنىڭ ورىنباسارى:
- مىنە وسىدان كەيىن شەكاراداعى جۇك تاسىمالى جانداندى. مىسالى، كۇنىنە 8-9 پوەزد جىبەرە باستادىق. قازىرگى ۋاقىتتا ءبىز «التىنكول» بەكەتى ارقىلى ءبىر تاۋلىكتە 12 پوەزد وتكىزەمىز. بۇعان قوسا قىتاي تاراپى بىزگە 1200 كونتەينەردى بەرەتىندىگىن مالىمدەدى. ونى جىلدىڭ سوڭىنا دەيىن قابىلداپ الۋىم كەرەك.
دەگەنمەن، ءبىر كۇندە 12 جۇك پويىزىن وتكىزۋ تەمىرجول قاتىناسىنداعى جۇمىس اۋقامىنىڭ قالىپقا كەلۋى دەگەن ءسوز ەمەس. جالپى شەكاراداعى بەكەت ارقىلى كۇنىنە 20 پوەزد جۇرگىزۋگە مۇمكىندىك بار. تاۋار اينالىمى ازايعاندىقتان كەيبىر قازاقستاندىق كاسىپكەرلەر مەن الىپ- ساتارلاردىڭ تابىسى 50 پروتسەنتكە دەيىن تومەندەپ كەتتى. بۇعان قوسا شەكارادا تۋىنداعان كەدەرگىلەردەن لوگيستيكانىڭ تاريفتەرى دە ءوستى. ماسەلەن، 20 فۋتتىق ستاندارتتتى كونتەينەردى جەتكىزۋ قۇنى 6 مىڭ دوللاردان 12 مىڭ دولارعا دەيىن قىمباتتادى.
قانات كوبەسوۆ، «ق ت ج- جۇك تاسىمالى» ج ش س باس ديرەكتورىنىڭ ورىنباسارى:
- «دوستىق- الاشانقاي» بەكەتىندەگى جۇك تاسىمالىنىڭ ازايۋ سەبەبى قىتايداعى الاشاڭقاي بەكەتىندەگى ينفراقۇرىلىمدىق قايتا جوندەۋ جۇمىستارىنا بايلانىستى بولىپ وتىر. ال «التىنكول- قورعاس» باعىتىندا ەشقانداي شەكتەۋ جوق. بەكەت تەحنيكالىق نورمالارعا ساي جۇكتى قابىلداپ، جونەلتىپ جاتىر.
شەكاراداعى الىس- بەرىستە تۋىنداعان كەدەرگى وتاندىق ءىرى تاۋار وندىرۋشىلەرگە كەسىرىن تيگىزىپ وتىر. قىتايعا ەكسپورتتالعان ازىق- تۇلىك ونىمدەرى شەكارادا كوپ ۋاقىت تۇرىپ قالىپ جاتىر. تاۋاردىڭ تۇتىنۋ مەرزىمى ءوتىپ كەتسە، كاسىپكەر شىعىنعا باتادى. ال كەيبىر كاسىپكەرلەر جۇكتەرىن تاستاپ كەتكەن. ەندى ولار تەمىرجول قاتىناسىنا كەدەرگى كەلتىرۋدە.
«قازاقستان تەمىرجولى» كومپانياسى وكىلدەرىنىڭ ايتۋىنشا، شەكاراداعى جاعداي قاراشا ايىندا تۇراقتانۋى مۇمكىن. ول ءۇشىن ماسەلەنى ۇكىمەتارالىق كوميسسيا باقىلاۋعا الۋى قاجەت.
www.24.kz
