جاھاندىق جىلىنۋ ماسەلەسى شەشىمىن تابا ما؟
جەتەكشى كليماتولوگ- عالىمداردىڭ زەرتتەۋلەرىنە سايكەس جاھاندىق جىلىنۋ سەلسي بويىنشا 1,5 گرادۋستان جوعارى بولسا، جاعداي قاتتى قيىنداي تۇسەدى. عالىمداردىڭ پايىمداۋىنشا، كەدەي مەملەكەتتەرمەن قاتار اۋقاتتىلارى دا زارداپ شەگىپ، قۋاڭشىلىقتار، سۋ تاسقىنى جانە اپتاپ ىستىق ميلليونداعان ادامنىڭ ومىرىنە اسەر ەتپەك.
كورتني فينگار، Investment monitor جۋرنالىنىڭ باس رەداكتورى:
- كونفەرەنسيانىڭ ماڭىزدىلىعى وتە جوعارى. ويتكەنى ناتيجە شىعارۋ ءۇشىن ماسەلەنى تالقىعا سالۋ كەرەك. شارا سوڭىنا قاراي تاراپتار ورتاق مامىلەگە كەلە الماسا، مەن تاڭ قالمايمىن. سوندىقتان قانداي دا ءبىر بولجام قۇرۋ قيىن دەپ ايتار ەدىم.
عالىمجان قارامان ۇلى، ءتىلشى:
- گلازگو قالاسىندا قازىر قاۋىپسىزدىك شارالارى كۇشەيتىلگەن. ويتكەنى كونفەرەنتسياعا الەمنىڭ تۇكپىر- تۇكپىرىنەن دەلەگاتتار عانا ەمەس نارازىلىق ءبىلدىرۋشى توپتار دا جينالىپ جاتىر. ولاردىڭ باستى ماقساتى - ەكولوگيالىق اپات الدىندا تۇرعان عالامشاردى قۇتقارۋ ءۇشىن شۇعىل شارالار قابىلداۋعا الەم كوشباسشىلارىن شاقىرۋ.
باياۋ جىلدامدىقپەن مەجەگە جەتۋ مۇمكىن ەمەس دەيدى ەكوبەلسەندىلەر. 2025 -جىلعا قاراي ورمان اعاشتارىن كەسۋدى دوعارىپ، 2035 -جىلعا قاراي كومىر جاعۋدى توقتاتقاندا، 2040 -جىلى بارلىعىن ەلەكتر كولىگىنە وتىرعىزىپ، 2045 -جىلى تازا ەنەرگەتيكاعا كوشكەندە عانا جاعداي جاقسارادى. ال وعان جەتۋ ءۇشىن بيلىكتە قارجى مەن ساياسي ەرىك- جىگەر جوق دەيدى ولار.
گەرليندا حوففمانن، گەرمانيالىق بەلسەندى:
- ءبىز جەر پلانەتاسىنىڭ جىلىنۋىن توقتاتۋ ءۇشىن ساياساتكەرلەردىڭ بىلەك سىبانا ارەكەت ەتكەنىن قالايمىز. بۇل تەك ەۋروپا ءۇشىن عانا ەمەس، بۇكىل الەم ءۇشىن ماڭىزدى ماسەلە.
سامميتكە قىتاي كوممۋنيستىك پارتياسىنىڭ ءتوراعاسى شي جينپين مەن رەسەيدىڭ پرەزيدەنتى ۆلاديمير پۋتين قاتىسپايدى. قوس الپاۋىت مەملەكەتسىز پىكىرتالاستار تولىققاندى وتپەيتىنى انىق. دەي تۇرعانىمەن، ۋاقىتىنان بۇرىن ءتۇڭىلۋدىڭ قاجەتى جوق دەيدى ماماندار. ەكى اپتاعا سوزىلاتىن كەلىسسوزدەر كەزىندە تاراپتار ۋادەلەر بەرىپ قانا قويماي، ولاردىڭ ورىندالۋىنا اتسالىسسا، ناتيجە مىندەتتى تۇردە بولادى.
عالىمجان قارامان ۇلى
www.24.kz
