تۇركيادا كۇزەتشىلەردەن تاياق جەگەن قازاق قىزى: ىستانبۇلداعى باس كونسۋلدىق تۇسىنىك بەردى

نۇر-سۇلتان. قازاقپارات - تۇركيادا ءدامحانانىڭ كۇزەتشىلەرىمەن كەلىسپەي قالىپ، سالدارىنان تاياق جەگەن قازاقستاندىق ۇلبوسىن مالعاجداروۆانىڭ جاعدايى مەن سوت ىسىنە قاتىستى تۇسىنىكتەمە بەرىلدى، دەپ حابارلايدى قازاقپارات ءتىلشىسى.

ەسكە سالا كەتسەك، تۇركياداعى وتانداسىمىز ەلگە ورالاردان ءبىر اپتا بۇرىن قۇربىلارىمەن ءدامحاناعا بارىپ، سول جەردىڭ كۇزەتشىلەرىمەن كەلىسپەي قالعان. ارتى توبەلەسكە ۇلاسىپ 33 جاستاعى قازاقستاندىق كەلىنشەك كۇزەتشىنىڭ قولىن تىستەپ العاندىعى ايتىلدى.

كۇزەتشىلەر ايەلدى سوققىعا جىعىپ، ونى پوليتسياعا ۇستاتىپ جىبەرگەن. تاياۋدا جەرلەسىمىزدىڭ قازاقستانداعى تۋىستارى «وقيعانىڭ بولعانىنا 3 اي ءوتتى، باۋىرىمىزدان ەشقانداي حابار جوق» دەپ دابىل قاقتى.

وسى ورايدا ەلىمىزدىڭ ىستانبۇلداعى باس كونسۋلدىعى اتالعان وقيعاعا تۇسىنىك بەردى.

«2021 -جىلى 11-شىلدەدە ىستانبۇل قالاسىنىڭ تۇنگى كلۋبتارىنىڭ بىرىندە قازاقستاندىق ءۇش ازاماتشانىڭ قاتىسۋىمەن وقيعا ورىن العان بولاتىن. تۇنگى كلۋب كۇزەتشىلەرى مەن ازاماتشالار اراسىندا تۋىنداعان تۇسىنىسپەۋشىلىك قول كوتەرۋگە دەيىن جەتكەن. كۇزەتشىلەردىڭ سوققىسىنان قورعانعان ق ر ازاماتشاسى ۇلبوسىن مالعاجداروۆا كۇزەتشىلەردىڭ ءبىرىنىڭ ساۋساعىن تىستەپ العان. دەنە جاراقاتىن كەلتىرگەنى ءۇشىن پوليتسيا ۇ. مالعاجداروۆانى قاماۋعا الدى»، - دەلىنگەن حابارلامادا. سونداي-اق، رەسمي اقپاراتتا بولعان وقيعاعا قاتىستى قازاقستاننىڭ تۇركياداعى وكىلدىگىنە حابار تۇسپەگەندىگى ايتىلادى.

«ق ر تۇركياداعى ەلشىلىگى مەن ىستانبۇلداعى باس كونسۋلدىعى بولعان وقيعانى ءوز كۇشىمەن انىقتاپ، ءتيىستى قولداۋ كورسەتۋ شارالارىن قولعا الدى. ماسەلەنى شەشۋ ماقساتىندا تۇركيانىڭ ءتيىستى ورگاندارىمەن بايلانىس ورناتىلدى. تۇركيانىڭ سىرتقى ىستەر مينيسترلىگى وكىلدەرىمەن ارنايى كەزدەسۋ وتكىزىلىپ، ماسەلەنىڭ تەز ءارى ادىلەتتى شەشىلۋى سۇرالدى. باس كونسۋلدىق قىزمەتكەرلەرى ۇ. مالعاجداروۆانىڭ جاعدايىن ءبىلۋ ءۇشىن ۋاقىتشا ۇستاۋ يزولياتورىنا بارىپ، ونىمەن كەزدەستى. سونداي-اق، ونىڭ ادۆوكاتىمەن بىرنەشە رەت كەزدەسۋ وتكىزىپ، تۇراقتى تۇردە تەلەفون ارقىلى اقپارات الىپ، ازاماتشامىزدىڭ جاعدايى مەن سوتتاعى ىسكە قاتىستى تۋىستارى حاباردار ەتىلدى. وسى ورايدا ۇلبوسىن مالعاجداروۆانىڭ تۋىستارى ونىڭ جاعدايى تۋرالى بىلمەيدى دەگەن اقپارات شىندىققا جاناسپايدى»، - دەيدى ۆەدومستۆودان.

ودان بولەك، حابارلامادا بۇگىندە وتانداسىمىز ۋاقىتشا ۇستاۋ يزولياتورىنان شىققانى كورسەتىلگەن. «26-قازاندا ۇ. مالعاجداروۆانىڭ ءىسى بويىنشا وتكەن سوت وتىرىسىنا باس كونسۋلدىق قىزمەتكەرلەرى قاتىستى. سوت شەشىمىنە سايكەس وتانداسىمىز سوت ءىسى اياقتالعانعا دەيىن تۇركيادان شىقپاۋ شارتىمەن يزولياتوردان بوساتىلدى. اتالعان ءىس بويىنشا تەرگەۋ جۇمىستارى جالعاسۋدا. تۇركيا ازاماتتارىنىڭ ۇستىنەن قارسى شاعىم تۇسىرىلگەن. باس كونسۋلدىق ۇ. مالعاجداروۆانىڭ سوت ءىسى اياقتالعانعا دەيىن باقىلاۋدا ۇستاپ، قولعابىس كورسەتۋدى جالعاستىرادى»، - دەگەن تۇسىنىكتەمە بەرىلدى.

اۆتور: ءالي يبرايەۆ