رەسەي بانكى قارجى پيراميدالارىنىڭ جاڭا ءتۇرىنىڭ تارالعانىن انىقتادى

مۇنداي پيراميدالار قاراپايىمدىلىعىمەن، ويىن فورماسىمەن جانە وڭاي تابىس تابۋ مۇمكىندىگىمەن ادامداردى تارتادى. بۇل تۋرالى ر ف و ب-نىڭ (ورتالىق بانكى) جوسىقسىز ءىس-ارەكەتتەرگە قارسى ءىس-قيمىل دەپارتامەنتىنىڭ باسشىسى ۆالەري لياح ءمالىم ەتتى، دەپ حابارلادى قازاقپارات تاسس اگەنتتىگىنە سىلتەمە جاساپ.

ۆالەري لياحتىڭ ايتۋىنشا، ادەتتە پايدالانۋشى اقشا الۋ مۇمكىندىگى بار ەكونوميكالىق ويىن جوباسىنا تىركەلىپ، ۆيرتۋالدى جىلجىمايتىن مۇلىك ساتىپ الادى نەمەسە تابىس اكەلۋى ءتيىس بەلگىلى ءبىر كەيىپكەردى ساتىپ الادى. ءبىراق ۇتىس نەمەسە سىياقى الۋ ءۇشىن جوباعا جاڭا ويىنشىلاردى - تۋىستارىن نەمەسە تانىستارىن اكەلۋ كەرەك. لياح بۇل ويىندار قارجى پيراميدالارىنداعىداي جەلىلىك ماركەتينگ قاعيداتى بويىنشا جۇمىس ىستەيتىنىن اتاپ ءوتتى. لياح ەگەر جاڭا ويىنشىلار بولماسا، وندا جوبا جۇرمەي، توقتاپ قالاتىنىن، ال اقشا قايتارىلمايتىنىن ايتتى.

باسىلىمنىڭ مالىمەتىنشە، جوباعا قاتىسۋ ءۇشىن قاراجات سايتتاعى جەكە كابينەت ارقىلى ءارتۇرلى تاسىلدەرمەن كريپتوۆاليۋتالار، ەلەكتروندى تولەم قۇرالدارى ارقىلى اۋدارىلادى. ورتالىق بانك دەپارتامەنتىنىڭ باسشىسى اتاپ وتكەندەي، كومپانيالار سايتتاعى پايدالانۋشى كەلىسىمدەرىندە اقشانى قايتارۋعا كەپىلدىك جوق ەكەنىن كورسەتكەن، ءبىراق ادەتتەگىدەي، ول تومەنگى جاعىندا كىشكەنتاي ارىپتەرمەن جازىلىپ تۇرادى ەكەن. ول سونداي-اق، مۇنداي ونلاين ويىن جوبالارى جاستار مەن بالالار ءۇشىن قاۋىپتى ەكەنىن ايتتى.

2021 -جىلدىڭ توعىز ايىندا رەسەي بانكى 424 قارجى پيراميداسىن انىقتاعان، ولاردىڭ 278 ى ءۇشىنشى توقساندا انىقتالعان. ال وتكەن جىلدىڭ العاشقى ءۇش توقسانىندا ورتالىق بانك 140 پيراميدانىڭ جۇمىسىن تىركەگەن بولاتىن.

اۆتور: اياۋلىم التىنبەك