اناسى قۇلىپتاپ كەتكەن: ەلوردا پوليتسەيلەرى بالالاردى قايعىلى جاعدايدان قۇتقاردى

نۇر-سۇلتان. قازاقپارات - ەلوردالىق پوليتسەيلەر بەسىنشى قاباتتىڭ اشىق تەرەزەسىنەن اناسىن شاقىرىپ جىلاعان بالانى قۇتقاردى، دەپ حابارلايدى قازاقپارات قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

پوليتسيانىڭ «102» ارناسىنا ساعات 21:00 دە ا. يمانوۆ كوشەسىندەگى ءۇيدىڭ بەسىنشى قاباتىنداعى اشىق تەرەزەدەن بالانىڭ قاتتى جىلاپ، اناسىن شاقىرعانى تۋرالى اقپارات كەلىپ ءتۇستى.

وقيعا ورنىنا اكىمشىلىك ۋچاسكەنىڭ پوليتسيا ينسپەكتورلارى جەدەل جەتتى.

«اتالعان فاكت راستالدى. بالانىڭ جارتى دەنەسى تەرەزەدەن جارتىلاي شىعىپ تۇرعان. ۋچاسكەلىك ينسپەكتور پوليتسيا كاپيتانى سەرىك كەڭەسوۆ جەدەل تۇردە بەسىنشى قاباتقا كوتەرىلىپ، ەسىكتى داۋىستاپ قاعا باستادى، ال ونىڭ سەرىكتەسى پوليتسيا كاپيتانى جومارت سارسەمبايەۆ جاعدايدى تومەننەن باقىلاپ وتىردى. كىشكەنتاي قىز ەسىكتىڭ قوڭىراۋىن ەستىپ، تەرەزەدەن تۇسكەن.

ەسىك جابىق بولعاندىقتان، پوليتسيا قىزمەتكەرى قىزبەن سويلەسىپ، ويىن ويناۋعا تارتتى.

پوليتسەي كىشكەنتاي قىزعا ەسىكتىڭ نەشە رەت قاعىلعانىن تاپسا، كوپتەگەن تاتتىلەر اپەرۋگە ۋادە بەرگەن. بۇل ۋاقىتتا قۇتقارۋشىلار پاتەرگە شاتىر ارقىلى كىرىپ، قىزدى قۇتقاردى»، - دەپ جازدى دەپارتامەنت.

بالانىڭ قاۋىپسىزدىگىنە كوز جەتكىزگەن سوڭ پوليتسەيلەر اناسىن بىرگە كۇتۋدى ۇيعاردى. ءبىر جارىم ساعاتتان كەيىن ءسابيدىڭ اناسى كەلگەن.

كەيىن انىقتالعانداي، قىزدىڭ اناسى ەكى جانە ءتورت جاستاعى بالالاردى سىرتىنان قۇلىپتاپ، ءوز شارۋاسىمەن كەتىپ قالعان. پوليتسەيلەر ايەلگە جاس بالالاردى قاراۋسىز قالدىرماۋ كەرەكتىگىن ءتۇسىندىردى.

«ال سەرىك كەڭەسوۆ بالاقايعا ۋادە ەتكەنىندەي، ءبىر پاكەت ءتاتتى ساتىپ اپەردى. باقىتىمىزعا وراي، تاپقىر پوليتسەيلەر قايعىلى وقيعانىڭ الدىن الدى. پوليتسەيدىڭ ءوزى دە بالا ءۇشىن قاتتى ۋايىمداعانىن ايتتى، ويتكەنى ءوزى دە ءتورت بالانى تاربيەلەپ وتىر»، - دەلىنگەن حابارلامادا.