قازاقستاندىق جاستاردىڭ شەتەلگە كەتۋىنە نە سەبەپ؟

نۇر-سۇلتان. قازاقپارات - ەل جاستارىنىڭ شەتەلدە تۇرۋعا قۇمارتۋىنىڭ سەبەبى انىقتالدى، دەپ حابارلايدى قازاقپارات ءتىلشىسى.

«جاستار ماسەلەسىن زەرتتەۋدىڭ ءبىر بولىگى كوشى-قون مەن موبيلدىلىك تاقىرىبىنا ارنالدى. ءبىز حالىقتىڭ، اسىرەسە ينتەللەكتۋالدىق بولىكتىڭ سىرتقا كەتۋ اعىنىن بايقاپ وتىرمىز. جاستاردىڭ كوبىسى قازاقستاندا جوعارى ءبىلىم الىپ، ەڭبەك ەتكىسى كەلەدى. دەگەنمەن ساپالى ءبىلىمدى شەتەلدە العىسى كەلەتىندەر دە از ەمەس. ستاتيستيكاعا سۇيەنسەك، قازاقستاندىق جاستاردىڭ 62 پايىزى ەلدەن كەتكىسى جوق. ال 12 پايىزى شەتەلگە كەتكىسى كەلەدى»، - دەدى «قازاقستان جاستارى: قۇندىلىقتاردى، بولجامداردى، تالپىنىستاردى باعالاۋ» اتتى زەرتتەۋ جوباسى اۆتورلارىنىڭ ءبىرى دينا ءشارىپوۆا.

سونداي-اق، سپيكەر جاستاردىڭ شەتەلگە قۇمارتۋىنىڭ سەبەبىن ءتۇسىندىردى.

«بىرىنشىدەن، جاقسى ءومىر ءسۇرۋ. زەرتتەۋگە قاتىسۋشىلاردىڭ 25 پايىزى وسى سەبەپتى اتاپ كورسەتتى. ەكىنشىدەن، شەتەلدە ساپالى ءبىلىم بەرىلەتىندىگى اتالدى. جانە ءبىر سەبەپ - وزگە مادەنيەتپەن تانىسۋ. سونىمەن قاتار جوعارى جالاقى تولەۋ دە ىقپال ەتىپ وتىر»، - دەيدى ول.

ودان بولەك، زەرتتەۋ بارىسىندا قازاقستاندىق جاستاردىڭ ىشكى ساياساتقا اسا قىزىقپايتىنى بەلگىلى بولدى.

«زەرتتەۋگە قاتىسۋشىلاردىڭ 80 پايىزى وتاندىق ساياساتقا قىزىعۋشىلىق تانىتپايتىندىعىن جەتكىزدى. ولار ءۇشىن ساياسات تاقىرىبى قىزىق ەمەس. تەك 3 پايىز جاستار عانا ساياساتقا جاقىن ەكەندىكتەرىن جەتكىزدى»، - دەدى د. ءشارىپوۆا.

ايتا كەتەيىك، بۇگىن ەلوردادا 14 پەن 29 جاس ارالىعىنداعى قازاقستاندىق جاستار اراسىندا جۇرگىزىلگەن زەرتتەۋ قورىتىندىلاندى.

جوبانى «BISAM Central Asia» ورتالىعى جۇرگىزدى.