پرەزيدەنت سيفرلاندىرۋعا جاۋاپتى ۆيتسە-مينيسترلەردى نە ءۇشىن سىنادى - باعدات مۋسين جاۋابى
كەشە «Digital Bridge « حالىقارالىق تەحنولوگيالىق فورۋمىندا قاسىم-جومارت توقايەۆ سيفرلاندىرۋ ىسىنە جاۋاپتى ۆيتسە-مينيسترلەر جۇمىسىنىڭ ناتيجەلىلىگىن سىنعا الدى.
پرەزيدەنت جىل سوڭىنا دەيىن سيفرلاندىرۋعا جاۋاپتى ءاربىر ۆيتسە-مينيستر ءۇشىن ناقتى KPI ازىرلەۋدى تالاپ ەتتى جانە پرەمەر-مينيسترگە ولاردىڭ قىزمەتىنە قاتىستى ۇستانىمدى قايتا قاراۋدى، كادرلىق قۇرامىنا باعا بەرۋدى تاپسىردى.
«شىن مانىندە، كەيبىر ۆەدومستۆولاردا سيفرلاندىرۋعا جاۋاپتى ۆيتسە-مينيسترلەر كومپيۋتەرلىك تەحنيكا ساتىپ الىپ، سەرۆەرلەردى ساتىپ الۋ ءۇشىن تەحنيكالىق سيپاتتامالار جازاتىن اقپاراتتىق تەحنولوگيالار جونىندەگى ۆيتسە-مينيسترلەرگە اينالىپ كەتتى. ەگەر باسشىلىقتا ينتەرنەتتەن اقاۋ تابىلسا، وسى رەتتەۋ جۇمىستارى سيفرلاندىرۋ جونىندەگى ۆيتسە-مينيسترگە جۇكتەلدى. شىن مانىندە، سيفرلاندىرۋ جونىندەگى ۆيتسە-مينيستر سيفرلىق ترانسفورماتسيانى ىلگەرىلەتۋمەن اينالىسۋى كەرەك. سيفرلىق ترانسفورماتسيا پروتسەستەردى اۆتوماتتاندىرۋدان وزگەشەلەنەدى»، - دەپ جاۋاپ بەردى مينيستر ورتالىق كوممۋنيكاتسيالار قىزمەتىندە ءتىلشى جاۋابىنا.
مينيستر اۆتوماتتاندىرۋ مەن سيفرلىق ترانسفورماتسيانىڭ ايىرماشىلىعى نەدە ەكەنىن ءتۇسىندىرىپ بەردى.
«اۆتوماتتاندىرۋمەن قانداي دا ءبىر ادىستەمەلىك تاپسىرمالار بەرىلگەن كەزدە اينالىستىق. مىسالى، جەر قويناۋىن پايدالانۋعا ليتسەنزيا نەمەسە قۇقىق بەرۋ. بۇل قۇقىق زاڭنامالىق اكتىلەردە جانە ءتيىستى نۇسقاۋلىقتاردا سيپاتتالدى. وعان جەتەكشىلىك ەتەتىن سالالىق ۆيتسە-مينيستر نەمەسە سالالىق دەپارتامەنت ونى اۆتوماتتاندىرۋ كەرەك دەپ جازدى، سودان كەيىن IT ماماندارى وسى پروتسەستەردى اۆتوماتتاندىرۋمەن اينالىستى. ءبىز قولدانىستاعى نورماتيۆتىك-قۇقىقتىق اكتىلەردى نەگىزگە الىپ، بيزنەس-پروتسەستەردى اۆتوماتتاندىرۋمەن اينالىستىق»، - دەدى ب. مۋسين.
بۇل رەتتە سيفرلىق دامۋ ءمينيسترى اۆتوماتتاندىرۋدىڭ قولدانىستاعى پروتسەستەردى جولعا قويۋ ەكەنىن اتاپ ءوتتى. ال سيفرلىق ترانسفورماتسيا - قازىرگى پروتسەستەردى تولىعىمەن قايتا قاراۋ.
«مىسالى، وتكەن جىلى حالىققا قىزمەت كورسەتۋ ورتالىقتارىنا كەلۋشىلەردىڭ كوپ ەكەنىن بايقادىق. وندا دا جاعدايدى تۇزەتۋگە، ونداعى پروتسەستەردى اۆتوماتتاندىرۋعا بولار ەدى. ءبىراق ءبىز كوپتەگەن قىزمەتتى ونلاين رەجيمىندە كوشىرۋدى ۇيعاردىق. ەكىنشى دەڭگەيدەگى بانكتەرمەن بىرلەسىپ، اۆتوكولىكتى ونلاين ساتۋ، ونلاين تىركەۋ سەرۆيسى جاسالدى، سيفرلىق ترانسفورماتسيا دەگەنىمىز وسى. سول كەزدە ءبىز ەتسق، ينتەرنەت، دەرەكتەر بازاسى جانە بيومەتريا بار ەكەنىن تۇسىندىك. وندا ادامدارعا ح ق ك و- عا بارۋدىڭ نە قاجەتى بار؟ ىشكى ىستەر مينيسترلىگىنە ۇسىنىس جاساعانىمىزدا ولار دا كەلىسىم بەرىپ، يدەيالاردى جىلدام ىسكە اسىردىق. قازىر اۆتوكولىكتەردىڭ 36 پايىزى ونلاين رەجيمدە قايتا راسىمدەلەدى. ادامدار ح ق ك و- عا بارمايدى. ەندى كەز كەلگەن پروتسەستى قايتا قاراستىرۋ قاجەت. مىنە، سيفرلىق ترانسفورماتسيا جونىندەگى ۆيتسە-مينيسترلەر ءار پروتسەستى اۆتوماتتاندىرىپ قانا قويماي، باستان-اياق قاراستىرۋى كەرەك، پرەزيدەنت وسىنى سىنعا الدى»، - دەپ ءتۇسىندىردى باعدات مۋسين.
مىسال رەتىندە مينيستر مۇگەدەكتىگى بار ادامداردىڭ مۇگەدەكتىك بەلگىلەۋ مەن جاردەماقى الۋ ءۇشىن 4 - ورىنعا بارۋعا ءماجبۇر بولعانىن ەسكە سالدى.
«بۇل پروتسەستى ەڭبەك جانە الەۋمەتتىك قورعاۋ ۆيتسە-مينيسترىمەن بىرلەسىپ، تولىعىمەن قايتا قاراپ، جاڭا مەحانيزم ۇسىندىق. ادام ەمحاناعا تەك ءبىر رەت بارادى، مەديتسينا قىزمەتكەرى ءبارىن دەرەكقورعا ەنگىزەدى، سودان كەيىن بارلىق پروتسەسس ونلاين رەجيمدە وتەدى، ونىمەن بايلانىس SMS نەمەسە ءموبيلدى قوسىمشا ارقىلى جۇرەدى. سيفرلىق ترانسفورماتسيانىڭ دا نەگىزگى ءمانى سول - بارلىق پروتسەستى قايتا قاراۋ، بار نارسەنى اۆتوماتتاندىرماۋ. قاسىم-جومارت كەمەل ۇلىنىڭ دا، مەنىڭ جۇمىسىمنىڭ دا كۇتەتىنى وسى. سيفرلاندىرۋ جونىندەگى ءاربىر ۆيتسە-مينيستر سالاعا تەرەڭ ءۇڭىلىپ، ترانسفورماتسيالاۋعا جانە سىبايلاس جەمقورلىق تاۋەكەلدەرمەن جانە ت. ب. قازىرگى جاعدايدى وزگەرتۋگە كومەكتەسەتىن جاڭالىقتاردى ۇسىنۋى قاجەت»، - دەدى باعدات مۋسين.
