باعدات مۋسين: اۋىلداعى ناۋقاستارعا جاساندى ينتەللەكت دياگنوز قويادى

بۇل تۋرالى ق ر سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى باعدات مۋسين ايتىپ بەردى، دەپ حابارلايدى قازاقپارات.

«سيفرلاندىرۋ، عىلىم جانە يننوۆاتسيالار ەسەبىنەن تەحنولوگيالىق سەرپىلىس» ۇلتتىق جوباسى اياسىندا جۇزەگە اسادى. «قازىرگى ۋاقىتتا اۋىل تۇرعىندارى ءۇشىن مەديتسينا مەن جالپى ءبىلىم بەرۋ جۇيەلەرىنىڭ ساپاسى تومەندەۋ بولىپ وتىر. ياعني ول ساپانى كوتەرۋ ءۇشىن ساپالى مۇعالىمدەر مەن بىلىكتى دارىگەرلەر قاجەت. سوندىقتان، مەديتسينالىق ماسەلەلەردى شەشۋ ءۇشىن دياگنوستيكانى سيفرلىق فورماتتا جۇرگىزۋىمىز كەرەك. مىسالى بىرنەشە وڭىردە پيلوتتىق جوبالاردى جۇزەگە اسىردىق. جاساندى ينتەللەكت ارقىلى وكپە اۋرۋلارىن نەمەسە ايەلدەردىڭ اۋرۋلارىن انىقتاۋ ءۇشىن مەيىربيكە ناۋقاستى رەنتگەن اپپاراتىنا الىپ كەلسە بولعانى. سول اپپارات سۋرەتى بازاعا جۇكتەلىپ، نۇر- سۇلتاننان، الماتىدان نەمەسە باسقا قالادان بىلىكتى ماماندار قاراپ، دياگنوز قويا الادى. ەكىنشىدەن جاساندى ينتەللەكتتىڭ ءوزى دە سول سۋرەتكە تالداۋ جاساپ، ءوز ۇسىنىمدارىن بەرە الادى. الداعى بەس جىلدا وسى تەحنولوگيالاردى ەنگىزۋدى جوسپارلاپ وتىرمىز»، - دەدى مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ءمينيستردىڭ ايتۋىنشا، مەكتەپتەردە بالالار كىتاپتاردى وزىمەن تاسىپ جۇرمەۋى ءۇشىن سيفرلىق تەحنولوگيالاردى كوبىرەك ەنگىزىلىپ، كەرەكتى ماتەريالدار سيفرلىق فورماتقا كوشىرىلىپ جاتىر.

ايتا كەتەيىك، بۇعان دەيىن مينيستر ەمحاناعا م ر ت سۋرەتى مەن اناليز ناتيجەلەرىن تاسۋ قاجەت بولمايتىنىن، ءار ادامنىڭ سمارتفونىندا ءوز دەنساۋلىعى تۋرالى اقپارات قولجەتىمدى بولاتىنىن ايتقان ەدى. مەملەكەت باسشىسىنىڭ جولداۋى اياسىندا «سيفرلاندىرۋ، عىلىم جانە يننوۆاتسيالار ەسەبىنەن تەحنولوگيالىق سەرپىلىس» ۇلتتىق جوباسى ازىرلەندى جانە بەكىتىلدى. ۇلتتىق جوبا اياسىندا حالىققا قىزمەت كورسەتۋ ورتالىقتارى دا سيفرلىق جانە ۆيدەوقىزمەتتەرىن ىسكە قوسادى.

قازاقستاننىڭ بارلىق بالالارى ينفورماتيكا جانە باعدارلامالاۋ بويىنشا ساپالى ءبىلىم الۋى ءۇشىن «ۆيرتۋالدى ينفورماتيكا مۇعالىمى» جوباسى ىسكە اسىرىلماق.

ودان بولەك، كەز كەلگەن قازاقستاندىققا IT داعدىلارىن تەگىن ۇيرەتەتىن 20 يننوۆاتسيالىق مەكتەپ اشىلادى. سونداي- اق، «ە- پەتيتسيا» ، «ە- ءوتىنىش» جانە باسقا دا الاڭدار قۇرىلىپ، كەز كەلگەن ادام مەملەكەتتىك ورگان جۇمىسىن باعالاي الادى.

اۆتور: ايجان سەرىكجان قىزى