اتىراۋدا ارحەولوگتار كونە كەرۋەن سارايدىڭ قالدىقتارىن تاپتى
تاۋەلسىزدىكتىڭ 30 جىلدىعىنا وراي التىن ورداعا ارنالعان عىلىمي-پراكتيكالىق كونفەرەنسيا اياسىندا ەكسپەديتسيا ءوتىپ، وعان عالىمدار مەن ارحەولوگتار قاتىستى. ماحامبەت اۋدانىنداعى سارايشىق اۋىلىنان 15 شاقىرىم جەردەن «سارايشىق» مەملەكەتتىك تاريحي- مادەني قورىق- مۋزەيىنىڭ قىزمەتكەرلەرى بيىل جۇرگىزگەن قازبا جۇمىستارى كەزىندە جەبە ۇشتارى، اينا، كەراميكا سىنىقتارى، تيىن ساقتايتىن شاعىن قۇمىرانى، وزبەك حان تۇسىنداعى تەڭگەلەر مەن مونەتالاردى تاپقان.
عالىمدار بۇل جەردە XIV عاسىردا ساۋدا كەرۋەندەرى توقتايتىن كەرۋەن سارايى بولعان دەپ بولجايدى.
«وسى جىلدىڭ ماۋسىم ايىندا ارحەولوگيالىق قازبا جۇمىستارىن باستادىق. اشىساي وزەنىنىڭ جاعاسىندا كەرۋەن سارايى، حالىق تۇراتىن تۇتاس ءبىر ەلدى مەكەن بولعانىن دالەلدەيتىن جادىگەرلەردى تاپتىق. كونە قۇمىرانىڭ سىنىقتارى مەن قىش ىدىستار بارلىق اۋماقتا كەزدەسەدى. ارحەولوگيالىق جۇمىستار ەندى عانا باستالدى. ءبىز بۇل اۋماقتى زەرتتەپ، قازبا جۇمىستارىن جۇرگىزەمىز»، - دەيدى اتىراۋ وبلىستىق تاريحي-مادەني قورىق- مۇراجايىنىڭ باس ينسپەكتورى ايبەك تۇرار ۇلى.
عالىمدار كونە كەرۋەن سارايى ورنىن قازاقستاننىڭ تاريحي- مادەني قۇندىلىقتارى تىزىمىنە ەنگىزۋدى ۇسىندى.
اۆتور: بەك مۇستافا
