بريتانيانى قيىن كەزەڭ كۇتىپ تۇر
لوكداۋننان كوز اشپاعان، برەكسيتتىڭ كەسىرىنەن ەكونوميكاسى كورشى ەلدەرگە قاراعاندا باياۋ دامىعان ۇلى بريتانيانى سونىمەن نە كۇتىپ تۇر؟
عالىمجان قارامان ۇلى، ءتىلشى:
- ەلدەگى ينفلياتسيا دەڭگەيى قىركۇيەك ايىندا 3,1 پروتسەنتكە جەتتى. ال كەلەر جىلى بولجامدارعا سايكەس 4 پروتسەنتكە وسەدى. جۇمىسسىزدىق دەڭگەيى 5,2 پروتسەنتكە ارتادى. ال ەكونوميكالىق ءوسىم دەڭگەيى 6 پروتسەنتتى قۇراماق. قارجى ءمينيسترى مالىمدەگەندەي، جۇك كولىگى جۇرگىزۋشىلەرىنىڭ جەتىسپەۋشىلىگىنەن تۋىنداعان تاۋار تاسىمالىنداعى ىركىلىس ءالى دە بىرنەشە ايعا سوزىلۋى مۇمكىن.
الداعى جىلدىڭ بيۋدجەت شىعىندارىنا كەلەر بولساق، 6 ميللياردقا جۋىق ستەرلينگ فۋنتى ۇلتتىق دەنساۋلىق ساقتاۋ جۇيەسىنە بولىنبەك. بۇل قاراجات بىرەنەشە جىلدان بەرى ناۋقاستار سارقىلا كۇتكەن دياگنوستيكا مەن وتاعا جۇمسالادى. سونىمەن قاتار سالانى ساندىق جۇيەگە كوشىرۋگە جانە عىلىمي زەرتتەۋلەرگە بولىنەدى.
سۋناك سونداي- اق ءبىلىم سالاسىنا، كولىك قاتىناسىنا جانە بيزنەستى قولداۋعا ءبىرتالاي قاراجات قاراستىرىلاتىنىن ايتتى. وسىلايشا، قازىرگى ۇكىمەت، كەزىندە دەۆيد كەمەرون مەن تەرەزا مەي ۇستانعان قاتاڭ ۇنەمدەۋ تارتىبىنەن باس تارتىپ وتىر.
ريشي سۋناك، ۇلىبريتانيا قارجى ءمينيسترى:
- بۇگىنگى بيۋدجەت كوۆيد كەلتىرگەن شىعىنداردىڭ ورنىن تولتىرمايدى. الدا ءالى قيىن كەزەڭدەر كۇتىپ تۇر. ءۇشىنشى بۋستەرلىك دوزانى الۋ قۇقىعى بار ادامداردى ءوز مۇمكىندىكتەرىن تەزىرەك پايدالانسا دەيمىن.
بۇگىنگى بيۋدجەت - كوۆيدتەن كەيىنگى جاڭا ەكونوميكانىڭ باستاۋى. وپپوزيتسيا وكىلدەرى بولسا، شارىقتاعان باعامەن كۇرەستە ۇكىمەت دارمەنسىزدىك تانىتىپ جاتىر دەپ كىنا تاقتى. لەيبورشىلار پارتياسىنىڭ كوشباسشىسى كير ستارمەر كوۆيد جۇقتىرىپ، جينالىسقا كەلە المادى. ونىڭ ورنىنا شىققان كولەڭكەلى مينيستر رەيچەل ريۆز «قىمباتشىلىقتان قاعاجۋ كورگەن وتباسىلار جانە جۇك تاسىمالىنداعى ىركىلىستەن زارداپ شەككەن كاسىپورىندار قارجى ءمينيسترى سۋرەتتەگەن ومىردەن بەيحابار بولىپ، ريشي سۋناك پاراللەل الەمدە ءومىر ءسۇرىپ جاتىر- اۋ دەپ ويلاۋى مۇمكىن» دەپ ايىپتادى.
كەيبىر ساراپشىلار دا قارجى ءمينيسترى بانكيرلەردىڭ، شاراپ شىعارۋشىلاردىڭ جانە ىشكى اۋە قاتىناسىمەن اينالىسۋشىلاردىڭ سالىقتارىن تومەندەتكەنىمەن، كوپتەگەن سايلاۋشىلارعا ايتارلىقتاي ەشتەڭە ۇسىنا الماي وتىر دەيدى.
پول دجونسون، قارجى زەرتتەۋلەرى ينستيتۋتىنىڭ ديرەكتورى:
- ورتاشا ءومىر سۇرەتىن ادامداردىڭ جالاقىسى الداعى 4-5 جىل كولەمىندە عانا وسەتىنى انىق. اسىرەسە، ايلىق تابىسى دۇكەندەگى باعالارعا ىلەسە المايتىندار وزدەرىن جايسىز سەزىنبەك. بارلىعى بىردەي جاقسى ءومىر سۇرەتىن جاڭا كەزەڭنىڭ كەلە جاتپاعانىن ەسكەرۋلەرىڭىز كەرەك دەپ ويلايمىن. بۇل سول بۇرىنعى سۇرلەۋدىڭ جالعاسى، ەكونوميكاداعى توقىراۋ دەسە دە بولادى.
ايتا كەتۋ كەرەك، كوگىلدىر وتىن مەن جارىق باعاسىنىڭ قىمباتتاۋىنان بۇگىندە 15 ملن شارۋا قوجالىعى زارداپ شەگىپ، ءومىر ءسۇرۋ ساپاسى ناشارلاپ كەلەدى. حالىق قارجى ءمينيسترىنىڭ «وپتيميزم ءداۋىرى» دەپ جاريالاعان ءۇش جىلدىق جوسپارى شىنىمەن دە جەتىستىككە جەتەلەسە دەپ ۇمىتتەنىپ وتىر.
عالىمجان قارامان ۇلى
www.24.kz
