الماتىدا الداعى جىلدارى قانداي نىساندار بوي كوتەرەدى

الماتى. قازاقپارات - الماتىلىقتار جايلى جانە اباتتاندىرىلعان اۋدانداردا تۇراتىن بولادى. بۇل تۋرالى جايلى قالالىق ورتا باسقارماسىنىڭ باسشىسى ساپار نۇراشيەۆ ءمالىم ەتتى، دەپ حابارلايدى قازاقپارات ءتىلشىسى.

بريفينگ بارىسىندا ساپار نۇراشيەۆ جاڭا نىساندار سالۋ جانە جوبالىق- سمەتالىق قۇجاتتاما ازىرلەۋ جوسپارلارى تۋرالى ايتتى. ۆەدومستۆو تاراپىنان 102 جوبا ازىرلەنىپ، ونىڭ 27 ءسى بويىنشا ساراپتاما قورىتىندىسى الىنعان.

«جاس قانات» شاعىناۋدانىندا 6 كوپپاتەرلى تۇرعىن ءۇي، «نۇركەنت» جانە «شۇعىلا» شاعىناۋداندارىندا يننوۆاتسيالىق شىعارماشىلىق ورتالىقتارى، سونداي- اق «زەردەلى» شاعىن اۋدانىندا 380 ورىندى جاتاقحاناسى بار 720 ورىندى كاسىپتىك- تەحنيكالىق مەكتەپ سالۋدى جوسپارلاپ وتىرمىز. بۇلاردان وزگە، №9, 15, 80, 122, 131, 141 مەكتەپتەرىن، «ءبىلىم- يننوۆاتسيا» مەكتەبىن سەيسميكالىق كۇشەيتۋ جانە كۇردەلى جوندەۋ جوسپارلانعان. سونداي- اق، «اقجار» شاعىناۋدانىندا 320 ورىندىق جانە «اينابۇلاق-4»، «سايالى-2» شاعىناۋداندارىندا ءارقايسىسى 160 ورىندىق ءۇش بالاباقشا سالىنادى»، - دەدى باسقارما باسشىسى.

جايلى قالالىق ورتا باسقارماسىنىڭ جوسپارىندا №70 بوبەكجاي- بالاباقشا مەن ستاحانوۆسكي كوشەسىندەگى بالاباقشانى سەيسميكالىق نىعايتۋ جانە كۇردەلى جوندەۋ جۇمىستارى تۇر. سپيكەر 30 كوپپاتەرلى تۇرعىن ءۇي مەن 18 دەنساۋلىق ساقتاۋ نىسانىنان تۇراتىن 48 جوبا قاراستىرىلىپ جاتقانىن جەتكىزدى.

«كەلەسى جىلعا ءبىز «قالقامان-2» ت ك جوبالىق- سمەتالىق قۇجاتتاماسىن ازىرلەپ جاتىرمىز. جوباعا سايكەس وسى قالا قۇرىلىسى تورابىندا بەس قاباتتى 20 ءۇي سالۋ كوزدەلگەن. 160 ورىندىق بالاباقشانىڭ جوباسى ازىرلەنۋدە»، - دەدى ساپار نۇراشيەۆ.

بولاشاقتا 2023-2024 -جىلدارى دەنساۋلىق ساقتاۋ سالاسىن دامىتۋ بويىنشا ءبىرقاتار ءىرى جوبانى ىسكە اسىرۋ جوسپاردا. بۇل جوبالارعا ءتورت ەمدەۋ مەكەمەسى، ءۇش ەمحانا، سەگىز وتباسىلىق- دارىگەرلىك امبۋلاتوريا كىرەدى. بۇگىندە بارلىق جوبا جوبالاۋ كەزەڭىندە.