ەلوردادا ۆاكسيناتسيا پۋنكتەرىنىڭ ءبىرى جابىلادى

نۇر-سۇلتان. قازاقپارات - ەلوردادا «حان شاتىر» ساۋدا، ويىن- ساۋىق ورتالىعىنداعى كوروناۆيرۋسقا قارسى ازاماتتاردى ەگۋ پۋنكتى جابىلادى.

قازاقپارات بۇل تۋرالى قالا اكىمدىگى سايتىنا سىلتەمە جاساپ حابارلايدى.

قوعامدىق دەنساۋلىق ساقتاۋ باسقارماسىنىڭ مالىمەتىنشە، ۆاكسيناتسيا پۋنكتى ءوز قىزمەتىن وسى جىلدىڭ 1-قاراشاسىندا اياقتايدى.

«جازدا ادامداردىڭ كوپتەپ كەلۋى كەزەڭىندە ەگۋ پۋنكتەرىن قالانىڭ 11 ساۋدا كەشەنىنە ورنالاستىردىق. بۇل وڭ ناتيجە بەردى جانە ءبىز ۆاكسيناتسيامەن حالىقتى بارىنشا قامتىدىق. قازىرگى ۋاقىتتا ۆاكسينالاۋعا جاتاتىن حالىقتىڭ باسىم بولىگى ەگىلگەندىكتەن، ساۋدا كەشەندەرى بازاسىندا ەگۋ پۋنكتەرىن ۇيىمداستىرۋدىڭ اسا قاجەتتىلىگى جوق. ءبىراق مۇنداي قاجەتتىلىك پايدا بولعان كەزدە ءبىز ءارقاشان پۋنكتەردى قايتادان اشۋعا دايىنبىز»، - دەدى قالالىق دەنساۋلىق ساقتاۋ باسقارماسىندا.

اقپاراتقا سايكەس، ەلوردادا بۇگىنگە دەيىن ساۋدا، ويىن- ساۋىق ورتالىقتارىندا، ساۋدا ۇيلەرى جانىنداعى ۆاكسينالاۋ ايماقتارىندا 100 مىڭنان استام ادام ەگىلدى. قالادا ازىرگە 5 ساۋدا نۇكتەسىندە ەگۋ پۋنكتەرى جۇمىس ىستەپ تۇر - «حان شاتىر» س و و (1-قاراشاعا دەيىن)، «كەرۋەن»، «ابۋ دابي پلازا»، «ازيا پارك» جانە «ەۆرازيا» ساۋدا ءۇيى. جالپى استانادا ۆاكسينانىڭ ءبىرىنشى كومپونەنتىن 444 مىڭنان استام ازامات الدى، 410 مىڭنان استام ادام تولىق يممۋنداۋدان ءوتتى.