ءشول شىنارى

نۇر-سۇلتان.قازاقپارات - توراڭعى اعاشى - ءشول دالانىڭ شىنارى. قازاقى ىرىمعا سۇيەنسەڭىز، ونى وتىن رەتىندە وتقا جاعۋعا بولمايدى. ءتىپتى، كەسۋگە دە رۇقسات جوق.

ويتكەنى سۇر- قوڭىرقاي قابىعىنا پىشاق تيسە، قىزعىلت ءتۇستى ءسول بولىنەدى. بۇل قانعا ۇقساس سۇيىقتىق ونىڭ كوز جاسىنا بالانىپ، كەسكەن ادامدى «توراڭعىنىڭ كيەسى ۇرادى» دەپ ويلاعان.

ءيا، كارتيناعا قاراپ، ءشول دالانىڭ كوركىنە اينالعان توراڭعىنى قاراشىعىڭىزداي قورعاۋعا ۇمتىلاسىز. قۇم قۇرساۋىندا قانات جايعان كيەلى اعاشتىڭ ۇلتتىق تانىمدا ءمانى زور. بەلگىلى سۋرەتشى قاليوللا احمەتجان «توراڭعى» كارتيناسى ارقىلى قايناعان ىستىقتا دا تامىرى قۇرعامايتىن بەرىك تە شىدامدى اعاشتىڭ بولمىسىنا بوياۋ توگەدى.

توراڭعى - قۇمدى جانە تۇزدى جەرلەردە وسۋگە بەيىم. قاتتى قۇرعاقشىلىق پەن جازدىڭ اپتاپ ىستىعىندا دا كولەڭكەسىن جوعالتپاعان تاباندى اعاش. ايتسە دە قاسيەتتى اعاشتىڭ كولەڭكەسىن پانالاۋعا بولمايدى ەكەن. بايىرعى اتا- بابالارىمىز سولاي ىرىمداعان. تامىرىنىڭ مىقتىلىعى ارقاسىندا جەراستى سۋىمەن قورەكتەنەدى. جاز مەزگىلىندە سولتۇستىك بالقاش ايماعىندا وسىمدىك بىتكەن تۇگەل دەرلىك قۋراپ كەتسە دە توراڭعى قىڭق ەتپەيدى.

سۋرەتشى تۋىندىدا ۋاقىت پەن جەلدىڭ اسەرىنەن جاپىراقتارى سارعايىپ، بۇتاقتارى قۋراعان كارى اعاشتى بەينەلەيدى. كەنەپتە كۇرەڭ جاپىراقتارى جارقىراپ، جەرگە كولەڭكەسىن ءتۇسىرىپ تۇر. اشىق اسپان مەن قارا تەرەك دىڭدەرىنىڭ ءتۇس كونتراستى كارتينانى ءتىپتى ارلەندىرەدى. ودان ءارى ءمانى مەن ماڭىزىن ايقىنداپ تۇرعانداي.

سۋرەتشى اعاشتىڭ قولايسىز جەردە ءوسىپ تۇرعانىنا قاراماستان، ادامدارعا كولەڭكە بەرۋ ءۇشىن جىلدان- جىلعا جاپىراق جاياتىنىنا تاڭعالادى. ءسويتىپ، ونى الىپ اداممەن تەڭەستىرەدى. قانداي جاعدايدا دا كۇش ساقتاۋدىڭ امالىن ىزدەپ، ءوزىنىڭ تامىرىنا سۇيەنىپ وسكەن توراڭعى قازاقتىڭ وزىندەي كورىنەدى. كارتينا ديۆيزيونيزمگە (پۋانتيليزم) ۇقساس ق. احمەتجانعا ءتان اۆتورلىق مانەردە ورىندالعان.

ءتۇرلى- ءتۇستى تۇتاس تاڭباعا اينالعان استىڭعى قاباتتىڭ رەڭكتەرى مەن ۇستىڭگى ءتۇس نۇكتەلەرىنىڭ وپتيكالىق بىرىگۋىنىڭ ناتيجەسىندە كەنەپتە ەرەكشە كومپوزيتسيا پايدا بولعان. كارتيناعا الىستان قاراساڭىز، وپتيكالىق اسەردىڭ ناتيجەسىندە كەڭىستىكتىڭ تەرەڭدىگى، زاتتاردىڭ ناقتى ءپىشىنى كورىنەدى. ال جاقىننان قاراساڭىز، ءپىشىن مەن ءارتۇرلى رەڭك ۇساق بوياۋ جاعىندىلارىنا اينالادى.

وسىلايشا، جارىقتىڭ تۇسۋىنە، قاراۋ نۇكتەسى مەن قاشىقتىعىنا بايلانىستى كارتينانىڭ جالپى قۇرىلىمى كورەرمەنگە ەرەكشە اسەر سىيلايدى.

مۇحتار كۇمىسبەك

egemen.kz