ەلدە ينتەرنەت- الاياقتاردىڭ قاتارى كوبەيىپ بارادى

نۇر-سۇلتان.قازاقپارات - اقتوبە وبلىسىندا ءتۇرلى ايلا- امالدار ارقىلى تۇرعىنداردى الداپ، اقشاسىن يەمدەنەتىن الاياقتار كوبەيىپ بارادى

عالامتور جەلىسى ارقىلى ارەكەت ەتەتىن قاسكويلەر اقتوبەلىكتەردىڭ قالتاسىنا دا، كارتاسىنا دا ءتۇسۋدى ادەتكە اينالدىرعان. تەرگەۋ بارىسىندا تۇرعىنداردىڭ وزگە ءوڭىر مەن شەتەل ازاماتتارىنا الدانعانى انىقتالدى. قازىر پوليسيا الاياقتاردان زارداپ شەككەندەردىڭ شاعىمىن قاراپ جاتىر. تاياۋ كۇندەرى ونعا جۋىق ءىس سوت قاراۋىنا جولدانباق. الاياقتارعا الدانىپ، 200 مىڭ تەڭگەسىنەن ايرىلعان ەرلان جىلقىبايەۆ قازىر پوليتسيادان كومەك كۇتىپ ءجۇر. ارمانداعان كولىگىن ينتەرنەت جەلىسىنەن ىزدەۋى ونىڭ وپىق جەۋىنە اكەپ سوقتىرعان. ءبىراق، العاشقىدا 20 دان جاڭا اسقان جىگىتتىڭ ەش كۇمانى بولماپتى. ءتىپتى، وزىنە لايىقتى تەمىر تۇلپاردى ارزان باعادا تاپقانىنا قۋانىپ، ساتۋشىنىڭ قويعان بار شارتىن ورىنداعان. الايدا ەلەكتروندىق ەسەپ- شوتىنا كولىك قۇنىنىڭ ءبىر بولىگىن اۋدارعان سوڭ، بايلانىس ۇزىلگەن.

ەرلان جىلقىبايەۆ، قالا تۇرعىنى:

- كولىك ارزان بولىپ شىقتى. 650 مىڭ تەڭگە سۇرادى. ساتۋشى ءوزىنىڭ رەكۆيزيتتەرىن جىبەردى. رەسەي سچەتىنىڭ رەكۆيزيتتەرى بولدى. سوعان 200 مىڭ تەڭگە قوسىمشا تولەم سۇرادى. كولىك ۇناپ تۇرعان سوڭ قىزىقتىم. تاعى 200 مىڭ تەڭگە رەسەي سچەتىنا سالدىم. سول اقشانى سالعاننان كەيىن كولىكتىڭ مەكەنجايىن ايتامىن، الىپ كەتەسىڭ، - دەدى. ودان كەيىن بايلانىسقا شىقپاي قالدى. حابارلاستىم، تەلەفوندارى ءوشىرۋلى بولدى. سودان كەيىن وسىنداي جاعدايعا تۇسكەنىمدى ءبىلدىم. پوليتسياعا بارىپ ارىز جازدىم. ەندى شەشىلەدى دەپ ۇمىتتەنەمىن.

اقتوبە وڭىرىندە ينتەرنەت- الاياقتىقتىڭ كوبەيە تۇسكەنىن پوليسەيلەر دە مويىنداپ وتىر. ماسەلەن بيىلعى 9 ايدا تىركەلگەن دەرەك وتكەن جىلدىڭ وسى كەزەڭىمەن سالىستىرعاندا ەكى جارىم ەسە كوپ. ناقتى ايتقاندا، 876 دەرەك. تالداۋ بارىسىندا، وزگەنىڭ ءتولقۇجاتى مەن باسقا دا اقپاراتتار ارقىلى قارجى ۇيىمدارىنان نەسيە الۋ، سايتتاردا جاريالانعان جارناما بەرۋشىلەرمەن بايلانىسىپ، ولاردىڭ اقشاسىن قاعۋ جانە بانكتىڭ اتىن جامىلىپ حابارلاسۋ ارقىلى جۇرتتىڭ كارتالارى مەن ەسەپ- شوتتارىنداعى قارجىنى يەمدەنگەنى بەلگىلى بولدى.

پاتەر، جەر قۇجاتتارىن راسىمدەۋ مەن «جۇمىسقا ورنالاسۋعا كومەكتەسەمىن» دەگەن جالعان ۋادەگە سەنگەندەر دە جەتەدى. ال، الاياقتارعا كەتكەن اقشانىڭ كولەمى ءارتۇرلى. پوليتسياعا تۇسكەن ىستەردىڭ ىشىندە ءبىر ادامنىڭ ءبىر جارىم ميلليون تەڭگەسىنەن قاعىلعان شاعىمى دا بار.

سەرىك شالحاروۆ، وبلىستىق پ د كريمينالدىق پوليتسيا باسقارماسىنىڭ باسشىسى:

- كۇدىكتىلەر بۇل باسقا وبلىستان دا بار. ويتكەنى ءبىر جەردە وتىراتىن ناقتى وسى اقتوبەنىڭ ادامدارى دەپ ايتا المايمىز. ويتكەنى كوپ قىلمىسكەرلەردى ۇستايمىز، بىلەمىز. ولار باسقا وبلىستان بولىپ كەلەدى. ءبىز باسقا وبلىسقا ءىس ساپارمەن بارىپ، ولاردى الىپ كەلىپ جاتقان دا جاعدايلارىمىز بار. ينتەرنەت جۇيەسى ارقىلى دا حابارلامالار تاراتىپ جاتقان جايىمىز بار. پروفيلاكتيكانىڭ ىشىندە وسى بارلىق تۇرعىندارعا جەتكىزۋ دە بار.

ينتەرنەت- الاياقتاردىڭ قانداي ادىستەرى بار ەكەنىن، قالاي وعان ءتۇسىپ قالماۋ كەرەكتىگىن تۇسىندىرەمىز. پوليتسيا قىزمەتكەرلەرى الاياقتاردىڭ زاڭسىز ارەكەتى كوبىنەسە عالامتور ارقىلى بولاتىندىقتان ولاردى شۇعىل قولعا ءتۇسىرۋدىڭ وڭاي ەمەس ەكەندىگىن ايتادى. الايدا ءتارتىپ ساقشىلارىنىڭ دا تاجىريبەسى ارتىپ، قازىر بىلىكتى مامانداردان جاساقتالعان تەرگەۋ توبى قۇرىلعان. ال، جىل باسىنان بەرى قولعا تۇسكەن بەس توپقا قاتىستى ءىستىڭ كەيبىرى بۇگىندە سوتتىڭ قاراۋىندا جاتىر. دەگەنمەن، ساراپشىلار قىلمىستىڭ بۇل ءتۇرىن جويۋ مۇمكىن ەمەس دەيدى. سەبەبى، پاندەميا كەزەڭىنەن بەرى ينتەرنەت ساۋدا دا قىزىپ تۇر. سوندىقتان ادامنىڭ ءوزى الاياقتىڭ قۇربانى بولۋدان ساقتانعانى دۇرىس.

رۋسلان شامىرحانوۆ، ساراپشى:

- سەنىمدىلىك قوي. باسقا ادامدار «مەنى الدامايدى» دەگەن ۇمىتپەن تەز سەنىپ قالامىز. ادام ناقتىلاۋ ءۇشىن قوسىمشا سۇراقتارىن قويۋ كەرەك. مىسالى، قانداي مەكەمەدەن حابارلاسىپ جاتقانىن، قانداي سەبەپپەن، ەگەر كارتالاردىڭ نومىرلەرىن، پ ي ن- كودتاردى سۇراپ جاتسا، 20 ساندى بانكتىڭ كودتارىن سۇراپ السا، ولار كوبىنەسە الاياقتار بولۋى مۇمكىن. جالپىلاي العاندا، جىل باسىنان بەرى 200 گە تاياۋ ءىستىڭ بەتى اشىلعان. بۇگىندە وسى الاياقتىقتىڭ الدىن- الۋ جانە وعان قارسى كۇرەس كۇشەيتىلدى.

اۆتورلارى: انۋاربەك مىرزاتاي ۇلى، بولاتبەك مولداعاليەۆ

www.24.kz