قازاقستان مەن ماجارستان اراسىندا شەشىمىن تاپپاعان ماسەلە جوق - مۇحتار تىلەۋبەردى
«ماجارستان پرەمەر- ءمينيسترىنىڭ ورىنباسارى، قارجى ءمينيسترى ميحاي ۆارگانىڭ قازاقستانعا كەشە باستالعان ساپارى بۇگىن جەمىستى جالعاسۋدا. بۇگىن ءبىز مەملەكەتارالىق ءوزارا ءىس- قيمىلدىڭ تۇراقتى جۇمىس ىستەيتىن ينستيتۋتى بولىپ تابىلاتىن قازاقستان - ماجارستان ستراتەگيالىق كەڭەسىنىڭ بەسىنشى وتىرىسىن وتكىزدىك. ماجارستان ورتالىق جانە شىعىس ەۋروپا وڭىرىندەگى ءبىزدىڭ بىردەن- ءبىر سەنىمدى ستراتەگيالىق ارىپتەسىمىز، دوستاس ءارى تاريحى تامىرلاس مەملەكەت. بۇگىنگى تاڭدا ەكى مەملەكەت اراسىندا شەشىمىن تاپپاعان ەشقانداي ماسەلە جوق»، - دەدى م.
تىلەۋبەردى ق ر سىرتقى ىستەر مينيسترلىگىندە وتكەن كەزدەسۋدە. مينيستر قوس مەملەكەت اراسىنداعى ساياسي ديالوگ جوعارى دەڭگەيدە ەكەنىن اتاپ ءوتتى. قازاقستان مەن ماجارستان ءبىر- ءبىرىنىڭ حالىقارالىق ارەناداعى باستامالارى مەن كۇش- جىگەرىن قولداپ كەلەدى.
«بۇل ءوز كەزەگىندە ەكىجاقتى جانە كوپجاقتى ءوزارا ءىس- قيمىلدى ودان ءارى دامىتۋعا قولايلى جاعداي تۋدىرادى. م. ۆارگا مىرزامەن قازاقستان مەن ماجارستان اراسىنداعى ساياسي، ساۋدا- ەكونوميكالىق، ينۆەستيتسيالىق جانە مادەني- گۋمانيتارلىق سالالارداعى ءوزارا ءىس- قيمىلدىڭ بۇگىنگى احۋالى مەن ودان ءارى دامۋىنىڭ پەرسپەكتيۆالارىن تالقىلادىق. ءبىز ءوزارا ءتيىمدى ىنتىماقتاستىقتى، ەڭ الدىمەن ەكونوميكالىق جانە ينۆەستيتسيالىق ءوزارا ءىس- قيمىلدى تەرەڭدەتۋ جانە ەكىجاقتى ساۋدانى ۇلعايتۋ ارقىلى ونى ودان ءارى نىعايتۋدىڭ ماڭىزدىلىعىن اتاپ وتتىك. اۋىل شارۋاشىلىعى، ەنەرگەتيكا، «جاسىل ەكونوميكا»، دەنساۋلىق ساقتاۋ، ءبىلىم جانە مادەنيەت سالالارىنداعى ىنتىماقتاستىققا ەرەكشە نازار اۋدارىلدى»، - دەدى مۇحتار تىلەۋبەردى.
اۆتور: ايجان سەرىكجان قىزى
