جالعان ۆاكسينا پاسپورتىن جاساتقان ايەل رەانيماتسيادا كوز جۇمدى - ماڭعىستاۋ
ورتالىق كوممۋنيكاتسيالار قىزمەتى ۇيىمداستىرعان ونلاين بريفينگىدە ب ا ق كوىلدەرىنىڭ جالعان ۆاكسيناتسيامەن كۇرەس تۋرالى ساۋالىنا جاۋاپ بەرگەن ماڭعىستاۋ وبلىسى اكىمىنىڭ ورىنباسارى گۇلميرا قالمۇراتوۆا وسىنداي دەرەك كەلتىردى، دەپ حابارلايدى قازاقپارات ءتىلشىسى.
«ۆاكسيناتسيانىڭ تازا ءجۇرۋىن ءبىز اۋەل باستان قولعا الدىق. بۇگىنگى تاڭدا ەكپە بەكەتتەرىنىڭ بارىندە باقىلاۋ كامەرالارى ورناتىلعان. نەگىزى ماڭعىستاۋ وبلىسىندا انىقتالعان دەرەك بويىنشا كەزىندە اقپارات بەرىلگەن. پوليتسيا دەپارتامەنتىنىڭ مالىمەت بويىنشا اقتاۋ قالاسىنداعى №1-ەمحانادا بۇل فاكتى تىركەلگەن. وكىنىشكە قاراي ول ىسكە دارىگەرلەرمەن مەن مەدبيكەلەردىڭ قاتىسى بار بولىپ شىقتى. قازىر سوتقا دەيىنگى تەرگەۋ ءجۇرىپ جاتىر. ودان باسقا فاكتىلەر انىقتالعان جوق»، - دەگەن اكىمدىك وكىلى.
سونداي-اق، ول بيىل ماڭعىستاۋ وبلىسىندا COVID-19 ىندەتىن جۇقتىرۋ كورسەتكىشى بىلتىرعىدان 5 ارتقانىن ەسكە سالدى.
«باعانا دا ايتتىم، 2020 -جىلدان باستاپ 23 مىڭنان استام ماڭعىستاۋلىق اۋىردى. سونىڭ ىشىندە 19 337 ادام 2021 -جىلدىڭ باسىنان بەرى كوروناۆيرۋسپەن اۋىرعان. ياعني، ناۋقاستانۋ دەڭگەيى بىلتىرعىدان 5 ەسە كوپ. سولاردىڭ ىشىندە ستاتسيونارلاردا ەمدەلىپ شىققانداردىڭ سانى 14 مىڭعا جاقىن. ولاردىڭ ىشىندە 89 ادام ۆاكسينانىڭ ءبىرىنشى كومپونەنتىن الىپ، يممۋنيتەتى ۋاقىتىندا قالىپتاسپاي، اۋىرىپ قالعان. ول كىسىلەر ەمدەلىپ شىقتى. ەكى كومپونەتىن دە الىپ اۋىرعان 65 ناۋقاس ستاتسيوناردا ەمدەلدى»، - دەگەن اكىمنىڭ ورىنباسارى ۆاكسيناتسيادان كەيىن ىندەت جۇقتىرىپ اۋرۋحانعا تۇسكەندەردىڭ ىشىندە ەكپە قۇجاتىن قولدان جاساعان ادام كەزدەسكەنىن اتادى.
«ءبىز وسى ناۋقاستار اراسىندا ءاربىرىن تەكسەرىپ، «ەكپەنى شىنىمەن الدى ما، الدە جالعان پاسپورتى جاساتتى ما» دەگەن ساۋالعا جاۋاپ ىزدەدىك.
«باسقا وڭىرگە بارىپ كەلدىم، سوندا ۆاكسينا العان ەدىم» دەپ، ءبىراق، وكىنىشكە قاراي، رەانيماتسياعا ءتۇسىپ قايتىس بولعان ازاماتشا بولدى بىزدە. ارينە بۇل جەردە ەكى جاقتىڭ ماسەلەسى بار. ءوزىمىز ءوزىمىزدى الداعانداي بولدىق. ۆاكسينادان قورىققاننان وسىلاي بولدى»، - دەدى گۇلميرا قالمۇراتوۆا.
اۆتور: ەسىمجان ناقتىباي
