كولىكتەگى باس پروكۋراتۋرا مينيسترلىكتىڭ زاڭسىز بۇيرىعىن جويدى

نۇر-سۇلتان. قازاقپارات - كولىكتەگى باس پروكۋراتۋرا يندۋستريا جانە ينفراقۇرىلىمدىق دامۋ مينيسترلىگىنىڭ بۇيرىعىنان زاڭسىزدىق تاۋىپ، كۇشىن جويدى، دەپ حابارلايدى قازاقپارات ءتىلشىسى.

«باس كولىك پروكۋراتۋراسىنىڭ قارسىلىعىنان كەيىن يندۋستريا جانە ينفراقۇرىلىمدىق دامۋ مينيسترلىگىنىڭ 2021 -جىلعى 8-ماۋسىمداعى «جاپپاي قاۋىپ» تەرمينىن انىقتاۋ جونىندەگى ۇسىنىستى بەكىتۋ تۋرالى» زاڭسىز بۇيرىعىنىڭ كۇشى جويىلدى. بۇل بۇيرىق مەملەكەت باسشىسى شاعىن بيزنەستى تەكسەرۋگە جاريالاعان موراتوريدى اينالىپ وتۋگە جانە اۆتوموبيل، تەمىرجول جانە سۋ كولىگى سالاسىنداعى كاسىپكەرلەردىڭ قىزمەتىنە نەگىزسىز ارالاسۋعا اكەلۋى مۇمكىن ەدى»، - دەپ جازادى قۇزىرلى ورگاننىڭ باسپا ءسوز قىزمەتى.

ۆەدومستۆونىڭ مالىمەتى بويىنشا، اتالعان اكتىدە قىزمەتى «جاپپاي قاۋىپپەن» بايلانىستى ميكرو جانە شاعىن كاسىپكەرلىكتىڭ 45 تۇرىنەن تۇراتىن تىزبە بولعان. كولىك قۇرالدارىن تەحنيكالىق تەكسەرۋ، ەلەكتروندىق تاحوگراف كارتاسىن دايىنداۋ جانە بەرۋ، تاكسي قىزمەتتەرىن كورسەتۋ سياقتى بيزنەستىڭ باستالعانى تۋرالى حابارلاماۋ دا «جاپپاي قاۋىپ» رەتىندە سيپاتتالعان.

«بۇل قۇقىقتىق اكت سانى شەكسىز كاسىپكەرلەردىڭ مۇددەلەرىن قوزعاعانىنا قاراماستان، ادىلەت ورگاندارىندا دا تىركەۋدەن وتپەدى. «قۇقىقتىق اكتىلەر تۋرالى» زاڭنىڭ 19 جانە 51-باپتارى بويىنشا، مۇنداي اكتىلەردى مەملەكەتتىك تىركەۋ ولاردىڭ كۇشىنە ەنۋىنىڭ قاجەتتى شارتى بولىپ تابىلادى. كولىكتەگى كاسىپكەرلەردىڭ كەز كەلگەن قۇقىقتارىن بۇزۋ تۋرالى ۆەدومستۆودا باس كولىك پروكۋراتۋراسىنىڭ موبيلدى توبىنا حابارلاۋدى سۇرايدى: 87172712251، 87172301910 جانە 87019900665»، - دەلىنگەن باسپا ءسوز قىزمەتىنىڭ مالىمەتىندە.