«الەم جاۋىنگەرى»: ەل اسكەرىندە ۇزدىك بىتىمگەر انىقتالادى
بىتىمگەرشىلىك قىزمەت - قازاقستاننىڭ سىرتقى ساياساتىنىڭ ماڭىزدى بولىگى. مەملەكەتتىڭ وسى اۋقىمداعى كۇش- جىگەرى قارۋلى قاقتىعىستاردىڭ الدىن الۋعا، ولاردى تەجەۋگە، توقتاتۋعا، گۋمانيتارلىق كومەك كورسەتۋگە باعىتتالعان. قارۋلى كۇشتەردە 2019 -جىلدان باستاپ جىل سايىن «الەم جاۋىنگەرى» سايىسى وتكىزىلەدى. وعان بارلىق قارۋلى كۇشتەر تۇرلەرىنىڭ جانە اسكەر تەكتەرىنىڭ اسكەري قىزمەتشىلەرى قاستىسادى.
سايىستىڭ نەگىزگى ماقساتى - مامانداردىڭ كاسىبي جانە بىتىمگەرشىلىك دايارلىعىنىڭ دەڭگەيىن ارتتىرۋ، اسكەري قىزمەتشىلەردىڭ كاسىبي تۇرعىدا وسۋىنە ىقپال ەتۋ بولىپ تابىلادى. - بۇل كونكۋرس بىتىمگەرلىك ميسسياعا تىڭ مارتەبە بەرۋگە باعىتتالعان. بۇگىندە وسى باعىت بۇكىل الەمدە وزەكتى بولىپ تابىلادى. گۋمانيتارلىق جانە بىتىمگەرلىك كومەك قاتار جۇرەدى. ءبىز بۇل باعىتتى دا دامىتۋىمىز كەرەك، - دەدى بىتىمگەرشىلىك دايارلىق باسقارماسىنىڭ اعا وفيتسەرى پودپولكوۆنيك ءىلياس مۇستافين.
سايىس تەوريالىق جانە پراكتيكالىق كەزەڭدەردەن تۇرادى. قاتىسۋشىلار بىتىمگەرشىلىك وپەراتسيالارىنىڭ قۇقىقتىق اسپەكتىلەرىن جانە بىتىمگەرشىلىك كودەكسىن، ب ۇ ۇ جارعىسىنىڭ نەگىزدەرى مەن ەرەجەلەرىن، كۇش قولدانۋ قاعيدالارىن جانە بىتىمگەرشىلىك كودەكسىن بىلۋگە ارنالعان تەستىلەۋدى تاپسىرادى. تاپسىرمالاردى ءىس جۇزىندە ورىنداۋ كەزىندە اسكەري قىزمەتشىلەر تەرەڭ ءبىلىمدى عانا ەمەس، سونىمەن قاتار زەرەكتىلىك پەن ەپتىلىكتى دە مەڭگەرۋى ءتيىس. توپتارعا بولىنگەن قاتىسۋشىلار اسكەرلەردىڭ قوزعالىسىن، كۇزەت پەن توسقاۋىل بەكەتتەردەگى قىزمەت جۇرگىزۋدى ۇيىمداستىرۋداعى بىلىكتىلىگىن كورسەتۋى كەرەك. ونىڭ ىشىندە ازاماتتىق پەرسونال مەن اۆتوموبيل تەحنيكالارىن ءتىنتۋ جۇمىستارىن جۇرگىزۋ ءتارتىبىن كورسەتەدى. ءاربىر جاعدايعا شاپشاڭ ءارى لايىقتى شەشىم قابىلداۋدى تالاپ ەتەتىن قوسىمشا تاپسىرمالار دا ۇسىنىلادى. ءار دۇرىس ورىندالعان تاپسىرما ءۇشىن بىتىمگەرلەرگە جەكە- جەكە ۇپايلار بەرىلىپ، ونىڭ ناتيجەلەرى بويىنشا جەڭىمپاز انىقتالاتىن بولادى. اتالعان «الەم جاۋىنگەرى» سايىسى اعىمداعى جىلدىڭ 25-قازانىنا دەيىن جالعاسادى.
