قىرعىزستان پرەزيدەنتى ءوزىنىڭ وكىلەتتىگىن كەڭەيتەتىن زاڭعا قول قويدى
پرەزيدەنت بارلىعىنا جاۋاپتى. قىرعىزستاندا پارلامەنت «مينيسترلەر كابينەتى» تۋرالى زاڭعا ەنگىزىلگەن تۇزەتۋلەردى بەكىتىپ، سادىر جاپاروۆ اتقارۋشى بيلىكتىڭ باسشىسى بولدى. سەبەبى جاڭا زاڭعا ساي پرەزيدەنت ۇكىمەت ءتوراعاسى قىزمەتىن دە بىرگە اتقارادى. ءبىراق پرەمەر- ءمينيستردىڭ تەحنيكالىق مىندەتتەرىن پرەزيدەنت اكىمشىلىگىنىڭ باسشىسى جۇزەگە اسىرادى.
مينيسترلەر كابينەتىنىڭ اپپاراتى بولسا، مەملەكەت باسشىسى اكىمشىلىگىمەن بىرىكتىرىلىپ، شەنەۋنىكتەر 30 پروتسەنتكە قىسقارادى.
يسحاك ماساليەۆ، پارلامەنتتىڭ ەكس- دەپۋتاتى:
- ءبىز اۆتوريتارلى رەجيمدى كۇشەيتكەننەن باسقا ەشنارسە ويلاپ تاپقان جوقپىز. ءبىراق مەن مۇنى جاعىمسىز تۇرعىدان ايتىپ تۇرعان جوقپىن. تەك قازىرگى جاعدايدى ايتىپ وتىرمىن. ويتكەنى مەنىڭ ءوزىم ەلدە ءبىر قوجايىن بولىپ، ونىڭ بارلىق ماسەلەگە جاۋاپتى بولعانىن قالادىم. بۇدان بولەك جاڭا وزگەرتۋلەرگە ساي پرەزيدەنتتىڭ رۇقساتىنسىز مينيسترلەردى قىلمىستىق جاۋاپقا تارتۋعا بولادى. ول ءۇشىن باس پروكۋروردىڭ شەشىمى جەتكىلىكتى. مەملەكەتتىك ماراپاتتارعا يە بولعان شەنەۋنىكتەردىڭ دە يممۋنيتەتى جويىلادى. ۇكىمەتتى پرەزيدەنت جاساقتاپ ، ال پارلامەنت ۇمىتكەرلەردى تەك تالقىلاۋ قۇزىرەتىنە يە بولماق. سەبەبى، پارتيالىق الاۋىزدىقتان سوڭعى جىلدارى ەلدە ساياسي تالاس- تارتىس كوپ تۋىنداعان.
يگور شەستاكوۆ، ساياساتتانۋشى:
- ۇكىمەتتىڭ پارتيا مۇشەلەرىنەن قۇرالعانىن ۇمىتپاۋ كەرەك. وسىعان بايلانىستى كابينەتتىڭ ءجيى وتستاۆكاعا كەتەتىنى كوپ سىنالدى ەمەس پە. جانە ولاردى پرەزيدەنت ەمەس پارلامەنت سايلاعانىن دا ۇمىتپاۋ قاجەت. ەندى ءمينيستردى پرەزيدەنتتىڭ ءوزى ورنىنان بوساتا الادى. ول ءۇشىن ءمينيستردىڭ قىزمەتىنەن بوساتۋ تۋرالى ءوتىنىشى نەمەسە پارلامەنت پەن ۇلتتىق قۇرىلتايدىڭ كەڭەسى جەتكىلىكتى.
بۇعان دەيىن مۇنداي شەشىمدى جوگورگۋ كەنەش قانا قابىلداپ، سىبايلاس- جەمقورلىققا باردى دەپ ايىپتالعان مينيستر ءوز قىزمەتىن جالعاستىرا بەرەتىن. ەندى ۇكىمەت مۇشەسى قىزمەتىنە كىرىسەر الدىندا جەكە كىرىسى جايلى دەكلاراتسيا تاپسىراتىن بولادى.
