جەردى قايتارىڭدار - جاپونيانىڭ جاڭا پرەمەر- ءمينيسترى پۋتينگە تالاپ قويدى
پارلامەنت مىنبەرىندە ءوزىنىڭ ساياسي باعدارلاماسىن جاريا ەتكەن ساياساتكەر كۋريل ارالدارىنا قاتىستى جەر داۋىن شەشۋگە باسىمدىق بەرەتىنىن اتاپ ءوتتى.
سولتۇستىك تەرريتوريالار توڭىرەگىندەگى ماسەلەلەردىڭ باسىن اشىپ العانىمىز ءجون، تەك سودان كەيىن عانا رەسەيمەن بەيبىت كەلىسىمگە قول قويۋدى تالقىلايتىن بولامىز»، - دەدى ول.
كيسيدا تەرريتورياعا قاتىستى جاپونيا تالابى تولىق ورىندالمايىنشا رەسەيمەن ارادا ءبىتىم ورناماسىن كەسىپ ايتتى.
7- قازاندا رەسەي پرەزيدەنتى ۆلاديمير پۋتينمەن تەلەفون ارقىلى تىلدەسكەن كيسيدا كۋريل ارالدارىنا قاتىستى ءوز كوزقاراسىن ورتاعا سالعان.
كيسيدا وڭتۇستىك كۋريلدە ورنالاسقان - كۋناشير، شيكوتان، حابوماي جانە يتۋرۋپ ارالدارىن جاپونياعا قايتارۋدى تالاپ ەتكەن.
«ءتورت ارال دا ءبىزدىڭ ەلگە تيەسىلى. ءبىز بۇل پوزيتسيامىزدان تايمايمىز. رەسەيمەن اراداعى كەلىسسوز تەك وسى باعىتتا ءوربيدى»، - دەپ اتاپ وتكەن ەكەن جاپون ساياساتكەرى.
ايتا كەتەلىك 1855 -جىلعى ەكىجاقتى ساۋدا- ساتتىق جانە شەكارا تراكتاتىنىڭ تالابىنا ساي جاپونيا - كۋناشير، شيكوتان، حابوماي جانە يتۋرۋپ ارالدارىنا يەلىك ەتۋگە قۇقىلى.
ەكىنشى دۇنيەجۇزىلىك سوعىستان كەيىن ك س ر و- مەن بىتىمگە كەلگەن توكيو، بەيبىت كەلىسىمنىڭ وتەۋى رەتىندە - ارالداردى جاپونيا قۇرامىنا قايتارۋعا قاتىستى شارت قويعان، الايدا تالاپ ءالى كۇنگە دەيىن ورىندالعان جوق.
1956 -جىلى ك س ر و جانە جاپونيا ديپلوماتتارى قايتادان ۇستەل باسىنا جينالادى. كەلىسسوز ناتيجەسىندە ماسكەۋ توكيوعا ءتورت ارالدىڭ تەك ەكەۋىن قايتارىپ بەرۋگە كونەدى. الايدا جاپونيا تارابى بۇل ۇسىنىستى قابىل المايدى. سەبەبى كسرو بيلىگى العاشقىداعى سەرتىنەن تايقىپ كەتكەن ەدى.
پۋتيندىك رەسەيدىڭ قازىرگى ءۋاجى: «ەكىنشى دۇنيەجۇزىلىك سوعىستان كەيىن اتالعان ارالدار كسرو قۇرامىنا ءوتتى، ولاردىڭ رەسەيگە تيەسىلى ەكەن داۋ تۋعىزبايدى» دەگەنگە سايادى.
كرەمل ماڭىنداعى ساراپشىلاردىڭ تۇسپالداۋىنشا ارال تاعدىرىنا قاتىستى جاپونيا پرەمەرىمەن وتەتىن ماڭىزدى تالقىلاۋدا پۋتين وسى ۇستانىمدا تۇرۋى ءتيىس.
