سەنات ءتوراعاسى سلوۆاكيانىڭ سىرتقى جانە ەۋروپا ىستەرى مينيسترىمەن كەزدەستى
كەزدەسۋ بارىسىندا پالاتا سپيكەرى پارلامەنتارالىق بايلانىستى بەلسەندى تۇردە دامىتۋدىڭ ماڭىزىنا توقتالىپ ءوتتى.
«قازاقستان پارلامەنتىنىڭ سەناتى سلوۆاكيا ۇلتتىق كەڭەسىمەن ىنتىماقتاستىقتى ودان ءارى نىعايتۋعا مۇددەلى. ءبىزدىڭ پارلامەنتىمىزدىڭ ەكى پالاتاسىندا دا سلوۆاكيامەن ىنتىماقتاستىق جونىندەگى توپتار جۇمىس ىستەيدى. سول سياقتى سلوۆاكيانىڭ ۇلتتىق كەڭەسىندە قازاقستانمەن دوستىق توبى بار ەكەنىن بىلەمىز. سوندىقتان الداعى ۋاقىتتا بىزدەر ونلاين نەمەسە وفلاين رەجيمدە بىرلەسكەن ءىس-شارالار ۇيىمداستىرا الامىز دەپ ەسەپتەيمىن. مۇنداي قادام ءبىزدىڭ ەكىجاقتى ءوزارا ءتيىمدى ءىس-قيمىلىمىزعا تىڭ سەرپىن بەرەدى دەپ سەنەمىن»، - دەدى ماۋلەن اشىمبايەۆ.
سونىمەن قاتار سەنات سپيكەرى قازاقستاندىق دەپۋتاتتاردىڭ سلوۆاكيالىق ارىپتەستەرىمەن حالىقارالىق الاڭدارداعى، ونىڭ ىشىندە ە ق ى ۇ پارلامەنتتىك اسسامبلەياسى مەن پارلامەنتارالىق وداق اياسىنداعى ءوزارا ءىس-قيمىل دەڭگەيىنە جوعارى باعا بەردى. سونداي-اق كەزدەسۋدە تاراپتار ەكونوميكا، ساۋدا، اۋىل شارۋاشىلىعى، تۋريزم جانە سۋ رەسۋرستارى سالالارى بويىنشا ىنتىماقتاستىق ماسەلەلەرىن تالقىلادى.
ماۋلەن اشىمبايەۆ سلوۆاكيانىڭ سۋ رەسۋرستارى سالاسى بويىنشا وڭىرلىك جانە حالىقارالىق جوبالاردى ىسكە اسىرۋدا تاجىريبەسى مول ەكەنىنە نازار اۋدارىپ، قازاقستان وسى باعىتتا بىرلەسىپ جۇمىس ىستەۋگە باسا ءمان بەرىپ وتىرعانىن ايتتى.
