قازاقستاندا ەسىرتكى اينالىمى جوعارى وڭىرلەر انىقتالدى

نۇر-سۇلتان. قازاقپارات - ق ر ىشكى ىستەر مينيسترلىگى ەسىرتكى قىلمىسىنا قارسى ءىس-قيمىل دەپارتامەنتىنىڭ باسقارما باستىعى بەرىكحان نۇرعاليەۆ ءى ءى م اقپارات الاڭىندا ەسىرتكى ەڭ كوپ تاركىلەنگەن وڭىرلەردى اتادى، دەپ حابارلايدى قازاقپارات ءتىلشىسى.

«وڭىرلەر بويىنشا ايتساق، سينتەتيكالىق ەسىرتكىنىڭ ەڭ كوپ مولشەرى ەسىرتكى زەرتحانالارى تابىلعان وڭىرلەردەن تاركىلەندى. اقتوبە وبلىسىندا - 36 كەلى، قاراعاندى وبلىسىندا - 16 كەلى جانە الماتى قالاسىندا - 13 كەلى سينتەتيكالىق ەسىرتكى تاركىلەندى»، - دەدى ول.

بەرىكحان نۇرعاليەۆ مالىمەتى بويىنشا، جالپى ەسىرتكىنىڭ كوپ مولشەرى جابايى قاراسورا القاپتارى انىقتالعان وڭىرلەردە تاركىلەنگەن.

«9 ايدىڭ قورىتىندىسى بويىنشا، تاركىلەنگەن جالپى ەسكرتكىنىڭ كولەمى بويىنشا تۇركىستان وبلىسى الدا كەلەدى - 5 توننا. جامبىل وبلىسىندا 3 توننا ەسىرتكى تاركىلەندى. ءۇشىنشى ورىندا شىعىس قازاقستان وبلىسى تۇر. ال اتىراۋ وبلىسىندا - 17 كەلى، باتىس قازاقستان وبلىسىندا - 23, شىمكەنت قالاسىندا - 57 كەلى ەسىرتكى تابىلدى. بۇل ەڭ از كورسەتكىش تىركەلگەن وڭىرلەر»، - دەدى ءى ءى م وكىلى.

اۆتور: ەسىمجان ناقتىباي