قاراعاندىدا اتتراكسيوننان سەكىرگەن قىز مەرت بولدى

نۇر-سۇلتان. قازاقپارات - قاراعاندىدا ايەل شاتىردان روۋپدجامپينگ اتتراكسيونىنان سەكىرىپ، قازا تاپتى، - دەپ حابارلايدى «نوۆىي ۆەستنيك» سايتى.

باسىلىم مالىمەتىنشە، 33 جاستاعى قاراعاندىلىق «سوزۆەزديە» قوناق ءۇيىنىڭ توبەسىنەن سەكىرگەن. عيمارات بيىكتىگى 30 مەتر.

ايەل ماقاجانوۆ اتىنداعى كوپسالالى اۋرۋحاناعا وتە اۋىر جاعدايدا جەتكىزىلدى: ميى شايقالعان، ىسىگەن، ميىشىلىك گەماتوما، تراۆماتيكالىق شوك. وعان شۇعىل تۇردە وتا جاسالدى. الايدا ايەل امان قالمادى، دەپ جازادى باسىلىم ءتىلشىسى.

قاراعاندى وبلىسى پ د باسپا ءسوز قىزمەتى وكىلدەرى بۇل وقيعا بويىنشا قىلمىستىق ءىس قوزعالعانىن حابارلادى.

«اتالعان دەرەك بويىنشا قازاقستان ق ك-نىڭ 306-بابى 1-بولىگى «تۇتىنۋشىلار ءومىرىنىڭ نەمەسە دەنساۋلىعىنىڭ قاۋىپسىزدىگى تالاپتارىنا ساي كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەر كورسەتۋ، سول سياقتى اتالعان تاۋارلاردىڭ، جۇمىستاردىڭ نەمەسە كورسەتىلەتىن قىزمەتتەردىڭ قاۋىپسىزدىك تالاپتارىنا ساي كەلەتىندىگىن كۋالاندىراتىن رەسمي قۇجاتتى قۇقىققا سىيىمسىز بەرۋ نەمەسە پايدالانۋ، بۇل ءىس- ارەكەتتەر ابايسىزدا ادامنىڭ دەنساۋلىعىنا زيان كەلتىرۋگە اكەپ سوعۋى« بويىنشا سوتالدى تەرگەپ- تەكسەرۋ باستالدى. وقيعانىڭ ءمان- جايى انىقتالىپ جاتىر»، - دەپ حابارلادى قاراعاندى وبلىسى پ د باسپا ءسوز قىزمەتىندەگىلەر.

ايتا كەتەيىك، قاراعاندى پوليتسەيلەرى روۋپدجامپينگ اتتراكسيونىنان سەكىرگەن 33 جاستاعى كەلىنشەكتىڭ ولىمىنە قاتىستى قىلمىستىق ءىستى قايتا قارادى.

«قىلمىستىق ءىس جاڭا اشىلعان مالىمەتتەرگە بايلانىستى ق ر ق ك-نىڭ 306-بابى 1-بولىگىنەن 3-بولىگىنە وزگەردى. تەرگەۋ امالدارى ءجۇرىپ جاتىر. قىلمىستىق ءىس اياسىندا پوليتسيا اتتراكتسيوندى ۇيىمداستىرۋشىنىڭ وسى قىزمەت تۇرىنە ليتسەنزياسى بار- جوعىن انىقتايدى جانە قاۋىپسىزدىك ەرەجەلەرىن تەكسەرەدى»، - دەدى پوليتسيا وكىلدەرى.

وسى باپ بويىنشا كىنالىلەر 8 جىلعا دەيىن باس بوستاندىعىنان ايىرىلۋى مۇمكىن. قاراعاندىلىق بلوگەر دەنيس دەنسكيدىڭ سوزىنشە، قازا تاپقان ەۆگەنيانىڭ ارتىندا كىشكەنتاي بالالارى مەن جولداسى قالدى. ول بۇرىن دا بيىكتەن سەكىرۋدى جاقسى كورگەن ەكەن.

Tengrinews.kz