دەنساۋلىق ءمينيسترى قازاقستاندىقتاردىڭ ەكپەدەن باس تارتۋ سەبەپتەرىن اتادى

نۇر-سۇلتان. قازاقپارات - پارلامەنت ماجىلىسىندەگى ۇكىمەت ساعاتىندا دەنساۋلىق ساقتاۋ ءمينيسترى الەكسەي سوي ءبىرقاتار اۋرۋلارعا قارسى پروفيلاكتيكالىق ەكپەدەن قانشا ادام باس تارتقانىن ايتتى، دەپ حابارلايدى قازاقپارات ءتىلشىسى.

«بۇرىنعىسىنشا ۆاكسينالاۋدان باس تارتۋ ماسەلەسى ءالى دە وزەكتى. 2013 -جىلدان باستاپ قازىرگى ۋاقىتقا دەيىن ۆاكتسينالاۋعا جاتقىزىلعانداردىڭ اراسىندا پروفيلاكتيكالىق ەكپەدەن 24976 ادام باس تارتتى. ونىڭ ىشىندە 58 پايىزى جەكە سەبەپتەرىمەن، 23,2 پايىزى ءدىني سەنىمى، 12,8 پايىزى ۆاكسيناعا سەنىمسىزدىك تانىتقاندىقتان، 6 پايىزى بۇقارالىق اقپارات قۇرالدارىنداعى نەگاتيۆتى اقپارات سالدارىنان ەكپە المادى»، - دەدى ا. سوي.

ونىڭ ايتۋىنشا، بيىلدىڭ 1-جارتىجىلدىعىندا ۆاكسينادان باس تارتۋدىڭ 3417 جاعدايى تىركەلدى. «تۇراقتى تۇردە ءتۇسىندىرۋ جۇمىستارىن جۇرگىزىپ كەلەمىز. بيىل ۆاكسينالاۋعا قاتىستى قارسى پىكىردەگى 197 ادام ويىن وزگەرتىپ، ەكپە سالدىردى»، - دەدى مينيستر.

ايتا كەتەيىك، ا. سوي بيىل ەلىمىزدە ءبىرقاتار قاۋىپتى ينفەكسيالار تىركەلمەگەنىن ءمالىم ەتتى.

اۆتور: رۋسلان عابباسوۆ