قاراعاندىلىق ءورت ءسوندىرۋشى ات ابزەلدەرىن جاساۋمەن اينالىسادى

قاراعاندى. قازاقپارات - قاراعاندىدا ءورت ءسوندىرۋشى- قۇتقارۋشى جۇمىسىنان بوس ۋاقىتىندا ات ابزەلدەرىن جاساۋمەن اينالىسادى. ازاماتتىق قورعاۋ سالاسىنىڭ كىشى سەرجانتى باعلان مىرزاحانوۆ ۇلتتىق قۇندىلىقتارىمىزدى جاس ۇرپاق ۇمىتپاسا دەيدى.

قازىرگى تاڭدا سيرەك كەزدەسەتىن كاسىپتى قاراعاندىلىق ءورت ءسوندىرۋشى- قۇتقارۋشى باعلان مىرزاحانوۆ اكەسىنەن ۇيرەنگەن. قىزمەتتەن بوس ۋاقىتىندا ول بىلعارىدان ەر- توقىم، ۇزەڭگى، جۇگەن، اۋىزدىق، مويىن ءجىپ، ايىل جانە تاعى باسقا بۇيىمداردى جاسايدى. ءار نارسەنى ۇلتتىق ستيلدە ورنەكتەۋگە تىرىسادى.

ازاماتتىق قورعاۋ كىشى سەرجانتى №11 ءورت ءسوندىرۋ بولىمىندە جۇمىس ىستەيدى. قيىن قىزمەتكە قاراماستان، ول حوببيىنە ۋاقىت تابادى.

«مەن قازاقتىڭ ۇلتتىق قۇندىلىقتارىن جاس ۇرپاق ۇمىتپاعانىن قالايمىن. بوس ۋاقىتىمدا اتقا مىنۋگە ارنالعان جابدىقتار جاساۋمەن اينالىسامىن. اكەم بالا كەزىنەن ءبىزدى ات ابزەلدەرىنىڭ ەرەكشەلىكتەرىمەن تانىستىردى»، - دەيدى شەبەر.

باعلان جىلقىلاردى جاقسى كورەدى. ول اۋىلدا ەرتە جاستان اتقا ءمىنىپ وسكەن، سوندىقتان شاباندوز ءۇشىن ساپالى ات ابزەلىنىڭ قانشالىقتى ماڭىزدى ەكەنىن جاقسى بىلەدى.

«ءبىر ەر- توقىمنىڭ تولىق ءوندىرىسى شامامەن ءبىر ايعا سوزىلادى. مەن ونى ۇلتتىق ناقىشپەن، ويۋ- ورنەكپەن ءمىنسىز ەتىپ جاساۋعا تىرىسامىن. ال قامشى ورۋگە 2-3 كۇن قاجەت. اتپەن ءجۇرۋ وتە ىڭعايلى بولۋى كەرەك، بۇل قولداعى قامشىعا دا بايلانىستى»، - دەيدى قولونەرشى.