تانىمال بالالار حيرۋرگى نۇرلان اقپاروۆ ومىردەن وزدى
بۇل تۋرالى پەدياتريا جانە بالالار حيرۋرگياسى عىلىمي ورتالىعىنىڭ ۇجىمى مەن باسشىلىعى Facebook - تە جازدى.
«بۇل تەك ءبىز ءۇشىن عانا ەمەس، بۇكىل قازاقستان ءۇشىن ورنى تولماس قايعى»، - دەپ جازىلعان ن. ن. اقپاروۆتىڭ تۋىستارى مەن جاقىندارىنا كوڭىل ايتۋ ماتىنىندە.
نۇرلان نۇرقا ۇلى اقپاروۆ مەديتسينا سالاسىندا 40 جىلدان استام جۇمىس ىستەگەن. ونىڭ ىشىندە 28 جىلدان استام پەدياتريا جانە بالالار حيرۋرگياسى عىلىمي ورتالىعىندا قىزمەت ەتتى. بۇل ارالىقتا دارىگەر 10000-نان استام وپەراتسيا جاسادى، كوپتەگەن بالالارعا ەكىنشى ءومىر سىيلادى. ن. ن. اقپاروۆ قازاقستان رەسپۋبليكاسىندا وپەراتسيالاردىڭ 21 ءتۇرىن العاش رەت ەنگىزگەن، 300-گە جۋىق عىلىمي جۇمىس جازعان، ونىڭ ىشىندە حالىقارالىق رەتسەنزيالاناتىن جۋرنالداردا جاريالاعان. ءۇش مونوگرافيانىڭ، 21 ونەرتابىسقا الدىن- الا پاتەنتتىڭ جانە ءۇش راتسيوناليزاتورلىق ۇسىنىستاردىڭ اۆتورى.
1994 -جىلى نۇرلان اقپاروۆ اكادەميك كامال ورمانتايەۆتىڭ جەتەكشىلىگىمەن حيرۋرگيا ءبولىمىن اشتى. سول ساتتەن ءومىرىنىڭ سوڭىنا دەيىن بالالار حيرۋرگياسى ءبولىمىن مەڭگەردى. ونىڭ جەتەكشىلىگىمەن ءبىر دوكتورلىق جانە ەكى كانديداتتىق ديسسەرتاتسيا قورعالدى.
2007 -جىلدان باستاپ دارىگەر ا ق ش- تىڭ Cincinnati Children's Hospital Medical Center قۇرمەتتى پروفەسسورى بولدى، 2007 -جىلدان باستاپ ەۋروپالىق جاراتىلىستانۋ عىلىمدارى اكادەمياسىنىڭ مۇشەسى بولدى. 2016 -جىلى روبەرت كوح اتىنداعى مەدالمەن، 2017 -جىلى عىلىمعا قوسقان ۇلەسى ءۇشىن الەكساندر III وردەنىمەن ماراپاتتالدى.
العاشقىلاردىڭ ءبىرى بولىپ جالپى حيرۋرگيا بويىنشا (نيۋ- يورك ق. , ا ق ش، 2004)، بالالار كولوپروكتولوگياسى بويىنشا (تسينتسيناتي ق. ا ق ش، 2006) جانە ۋلترادىبىستىق سكالپەلدى يگەرۋ بويىنشا (ماسكەۋ ق. )، لاپوروسكوپيالىق حيرۋرگيا بويىنشا (سانكت- پەتەربۋرگ ق. ) تاعىلىمدامادان ءوتتى.
ن. اقپاروۆ ا ق ش- تا تاعىلىمدامادان وتكەننەن كەيىن ت م د- دا ءبىرىنشى بولىپ انورەكتالدى ايماقتا (ءىش قۋىسى مۇشەلەرىنىڭ قاتەرسىز جانە قاتەرلى ىسىكتەرى) وپەراتسيالار جاساي باستادى. رەسەيدە مۇنداي وپەراتسيالار قازاقستاننان ءبىر جارىم جىل وتكەن سوڭ عانا ەنگىزىلدى. نۇرلان اقپاروۆ 2018 -جىلى مەديتسينا عىلىمىنا قوسقان ۇلەسى ءۇشىن الەكساندر III ەۋروپا وردەنىمەن ماراپاتتالدى. بۇل ماراپاتتى الەم بويىنشا تەك 17 ادام الدى. جوعارى ماراپات ەۋروپالىق كونگرەسىندە بەرىلدى.
ال 2008 -جىلى مەديتسينا مەن عىلىمعا سىڭىرگەن ەڭبەگى ءۇشىن قازاقستان مەتسەناتتار كلۋبىنىڭ «يلحام» رەسپۋبليكالىق سىيلىعىنىڭ لاۋرەاتى اتاندى، 2009 -جىلى ءمىنسىز ەڭبەگى مەن ادال ەڭبەگى ءۇشىن «حالىق باتىرى» سىيلىعىنىڭ لاۋرەاتى بولدى. بىلىكتى حيرۋرگ «قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى» (2005)، «ۇزدىك قىزمەتكەر»، «ۇزدىك عالىم» توسبەلگىلەرىمەن جانە كوپتەگەن ماراپاتتاردىڭ يەگەرى اتاندى.
اۆتور: ايجان سەرىكجان قىزى
