اقمولا وبلىسىنىڭ جاقسى اۋدانىنا جاڭا اكىم كەلدى

كوكشەتاۋ. قازاقپارات - اقمولا وبلىسىنىڭ اكىمى ەرمەك مارجىقپايەۆ جاقسى اۋدانىندا جۇمىس ساپارىمەن بولىپ، اۋدان اكتيۆىنە ق ر پرەزيدەنتى اكىمشىلىگىنىڭ كەلىسىمىمەن جانە اۋداندىق ءماسليحات دەپۋتاتتارىنىڭ قولداۋى نەگىزىندە ءوز وكىمىمەن تاعايىنداعان جاڭا اكىم الماگۇل قادرالينامەن تانىستىردى.

بۇل تۋرالى ايماق باسشىسى الەۋمەتتىك جەلىدەگى پاراقشاسىندا جازدى، دەپ حابارلايدى قازاقپارات ءتىلشىسى.

الماگۇل امانجول قىزى قادرالينا 1978 -جىلى دۇنيەگە كەلگەن، ءبىلىمى جوعارى. 1999 -جىلى ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىن اگرونوميا ماماندىعى بويىنشا ءتامامداعان. 2003 -جىلى قاراعاندى ەكونوميكالىق ۋنيۆەرسيتەتىن يۋريسپرۋدەنتسيا ماماندىعى بويىنشا بىتىرگەن. ەڭبەك جولىن 2000 -جىلى پروكۋراتۋرا مامانى بولىپ باستادى، 2004-2008 -جىلدار ارالىعىندا اقمولا وبلىسى جەر رەسۋرستارى كوميتەتى باسقارماسىنىڭ جەرلەردى پايدالانۋ جانە قورعاۋ بولىمىندە مامان بولىپ جۇمىس ىستەدى.

2008 -جىلدىڭ ناۋرىز ايىنان باستاپ، ءبىر جىل بويى ءوڭىرارالىق جەر ينسپەكتسياسىندا اقمولا، قاراعاندى وبلىستارى مەن استانا قالاسى بويىنشا زاڭ ءبولىمىنىڭ باس مامانى قىزمەتىن اتقاردى. 2009 - 2011 -جىلدارى ارالىعىندا ءوڭىرارالىق جەر ينسپەكتسياسىنىڭ اقمولا، قاراعاندى وبلىستارى مەن استانا قالاسى بويىنشا جەرلەردى پايدالانۋ مەن قورعاۋدى مەملەكەتتىك باقىلاۋ ءبولىمىنىڭ باسشىسى بولدى، كەيىن وندا باسشىنىڭ ورىنباسارى بولىپ تاعايىندالسا، ودان ءارى اقمولا وبلىسىندا اۋماقتىق جەر ينسپەكتسياسىنىڭ باسشىسى قىزمەتىن اتقاردى.

سونىمەن بىرگە، ونىڭ ەڭبەك جولىندا تابيعات رەسۋرستارى جانە تابيعاتتى پايدالانۋدى رەتتەۋ باسقارماسى باسشىسىنىڭ ورىنباسارى، جەر قاتىناستارى باسقارماسىندا باسشىنىڭ ورىنباسارى سەكىلدى قىزمەتتەر بار. جاڭا قىزمەتكە تاعايىندالعانعا دەيىن اقمولا وبلىسىنىڭ جەر قاتىناستارى باسقارماسىندا باسشىسى لاۋازىمىندا بولدى. ايتا كەتسەك، وسىعان دەيىن جاقسى اۋدانىندا اكىم بولعان باۋىرجان ءمالعاجداروۆ شورتاندى اۋدانىنىڭ اكىم لاۋازىمىنا تاعايىندالعان ەدى.